İqtisadiyyat.az bu gün baş verəcək hadisələrin siyahısını təqdim edir.
Bu gün Milli Məclisdə parlamentin Mədəniyyət komitəsinin təşkilatçılığı ilə ictimai dinləmə keçiriləcək. Dinləmədə Milli Məclisin deputatları, mövzu ilə əlaqədar aidiyyəti qurumların rəhbərləri, alim və tədqiqatçılar, media orqanlarının rəhbər şəxsləri, qeyri-hökumət təşkilatlarının nümayəndələri iştirak edəcəklər. Tədbir iştirakçıları Qərbi Azərbaycanda tarixi-mədəni irsimizin soyqırıma məruz qalması, bu kimi halların beynəlxalq ictimaiyyətə çatdırılması, bu bölgədə Azərbaycanın tarixi və mədəni irsinin bərpası və dirçəlişi ilə bağlı fikirlərini bölüşəcəklər, təkliflərini verəcəklər.
Biləsuvar rayonunun mərkəzində və 3 kənddə içməli suyun verilməsində məhdudiyyətlər yaranıb. Yağan intensiv yağışlar Kür çayında suyun bulanıqlığını artırıb və nəticədə rayona verilən içməli suyun təmizlənməsində ciddi fəsadlar yaranıb. Fəsadların aradan qaldırılması məqsədilə Biləsuvar şəhərində 5200, Zəhmətabad, Bəydili, Xırmandalı kəndlərində isə 900 abonentin gün ərzində içməli su ilə təminatında fasilə yaranacaq.
Bu gün 3x3 basketbol üzrə dünya qadın seriyasının Şuşa mərhələsinə start veriləcək. Açılış oyununda saat 13:00-da Almaniya və Türkiyə yığmaları üz-üzə gələcəklər. Azərbaycan kollektivi qrupdakı ilk oyunu saat 14:15-də Macarıstana, “Neftçi” klubu isə saat 13:50-də Rumıniya yığmasına qarşı keçirəcək.
Türkiyə Prezidenti Rəcəb Tayyib Ərdoğan Prezident seçildikdən sonra ilk səfərini iyunun 12-də Şimali Kipr Türk Respublikasına səfər edəcək. Bu, Türkiyədə dövlət ənənəsidir. Ərdoğanın Şimali Kipr Türk Respublikasına səfəri zamanı ikitərəfli əlaqələrlə bağlı bütün sahələrdə atılacaq addımlar barədə fikir mübadiləsi aparılacaq.
Bu gün Almaniyanın ev sahibliyi ilə NATO tarixinin ən böyük hava qüvvələri təlimi olan "Air Defender 23" başlayır. Təlimə 25 ölkədən 250 təyyarə və 10 min personal qatılacaq.
Bu gün UNESCO-ya daxil olan bütün ölkələrin nümayəndələrinin görüşü keçiriləcək və orada ABŞ-nin qayıdış planı müzakirə olunacaq.
Qazaxıstan prezidenti Kasım-Jomart Tokayev Abay rayonunda meşə yanğınında həlak olanlar üçün bu gün ümummilli matəm elan edib. Qazaxıstanın şərqindəki Abay rayonunda başlanan yanğın qısa müddət ərzində 60 min hektar ərazini əhtə edib. Yanğın nəticəsində 14 nəfər həlak olub və onlardan beşinin şəxsiyyəti müəyyən edilib.
