İqtisadiyyat.az bu gün baş verəcək hadisələrin siyahısını təqdim edir. 

Bu gün Milli Məclisin növbədənkənar sessiyasının növbəti iclası keçiriləcək. Gündəliyə 41 məsələ daxil edilib.

Bu gün Bakı və Sumqayıt şəhərləri, eləcə də Abşeron rayonu üzrə pensiyaların ödənilməsi nəzərdə tutulub. Bu barədə Dövlət Sosial Müdafiə Fondundan məlumat verilib. Güzəştli şərtlərlə pensiya hüququna malik şəxslərin pensiyaları bu ay da qrafik üzrə ödəniləcək.

Baş prokuror Kamran Əliyev bu gün saat 10:00-da Hacıqabul Rayon Prokurorluğunun inzibati binasında Hacıqabul, Salyan rayon və Şirvan şəhər sakinlərinin qəbulunu keçirəcək.

“Azəriqaz” İB-nin inzibati binasında növbəti “Açıq qapı” aksiyası bu gün keçiriləcək. Saat 11:00-da başlayacaq aksiya feysbuk sosial şəbəkəsi üzərindən canlı yayımlanacaq. Vətəndaşların sualları da canlı yayım vasitəsilə cavablandırılacaq. Hər bir media qurumu, QHT nümayəndəsi və sosial şəbəkə fəalları (blogger) bu tədbirə dəvətlidir.

Azərbaycan Velosiped Federasiyasının təşkilatçılığı ilə keçirilən "Əziz Şuşa Beynəlxalq Velosiped Turniri"ndə bu gün üçüncü tur keçiriləcək. Tura Qəbələ rayonunda start veriləcək və velosipedçilər Qəbələ-Ağdaş-Xaldan-Mingəçevir marşrut xətti üzrə və Bakı-Qazax avtomobil yolu ilə hərəkət edərək yarışın növbəti mərhələsini Gəncə şəhərində tamamlayacaqlar.

Bu gün aprelin 10-da yolu azaraq Ermənistan tərəfinə keçən hərbçilərimizdən biri – Hüseyn Axundovun "məhkəmə"si keçiriləcək. "İş" Zəngəzur vilayətinin ümumi yurisdiksiya məhkəməsinin hakimi Napoleon Ohanyana verilib. Qapalı keçirilən dinləmə ilə bağlı hələlik qərar verilməyib. "Məhkəmə"nin hazırlıq iclası bu gün saat 16:00-a təyin edilib.

Bu gün Rusiya Prezidenti Vladimir Putin Belarus prezidenti Aleksandr Lukaşenko ilə görüşəcək. Bu barədə Kremlin sözçüsü Dmitri Peskov bildirib.

Gürcüstanın Baş naziri İrakli Qaribaşvili bu gün Almaniya kansleri Olaf Şolts ilə görüşəcək.

Bu gün Cenevrədə Rusiya və BMT arasında “Taxıl sazişi” çərçivəsində memorandum üzrə məsləhətləşmələrin növbəti mərhələsi keçiriləcək. Bunu Rusiya xarici işlər nazirinin müavini Serey Verşinin jurnalistlərə bildirib.

Bu gün Azərbaycan Dövlət Akademik Filarmoniyasında Ü.Hacıbəyli adına Azərbaycan Dövlət Simfonik Orkestrinin konserti var. Konsert saat 19:00-da başlanır. Drijor Orxan Həşimov, solist Atabala Manafzadədir. Bilet 4 manatdır.

Bu gün Beynəlxalq Muğam Mərkəzində xanım ifaçıların təqdimatında “Musical journey” adlı konsert keçiriləcək. Pianoda Kərimova Zərif və Kazımova Ülviyyə, fleytada Nərgiz Əliyeva, violində isə Əbubəkirova Renata çıxış edəcək. Konsert saat 19:00-da başlanır. Biletin qiyməti 10 manatdır. 

Bu gün Heydər Əliyev Mərkəzində “Kremerata Baltika” Kamera Orkestrinin solistlərinin konserti olacaq. “Kremerata Baltika” dünyanın 50-dən çox ölkəsində mindən çox konsert proqramı ilə çıxış edib. Musiqiçilər 20-dən çox CD yazıb, 2002-ci ildə isə “Qremmi” mükafatına layiq görülüb. Bakı konsertinin solistləri - Litva Kremeratasının yaradıcısı, skripka ifaçısı Dzeraldas Bidva və tanınmış violonçel ifaçısı, bir çox müsabiqələrin laureatı Giedre Dirnavauskaitedir. Konsert saat 20:00-da başlanır. Biletlərin qiyməti 20-70 manat arasında dəyişir.