İqtisadiyyat.az bu gün baş verəcək hadisələrin siyahısını təqdim edir.
Xarici işlər naziri Ceyhun Bayramovun bu gün Slovakiya Respublikasına işgüzar səfəri gözlənilir. Səfər çərçivəsində onun Slovakiyanın xarici və Avropa işləri naziri Miroslav Vlaxovski, o cümlədən Slovakiyanın digər yüksək səviyyəli rəsmiləri ilə görüşlərin keçirilməsi nəzərdə tutulur.
Milli Məclisin deputatları - Fransa ilə parlamentlərarası əlaqələr üzrə işçi qrupunun rəhbəri Soltan Məmmədov, qrupun üzvləri Ramin Məmmədov və Tural Gəncəliyev bu gün Fransanın paytaxtı Parisə səfər edəcəklər. Millət vəkilləri Fransa Respublikası Milli Assambleyasının Azərbaycanla dostluq qrupunun üzvləri ilə görüşəcəklər. Görüşdə parlamentlərarası əməkdaşlığın inkişaf etdirilməsi və tərəfləri maraqlandıran digər məsələlərlə bağlı müzakirələr aparılacaq.
İqtisadiyyat Nazirliyi, İxracın və İnvestisiyaların Təşviqi Agentliyi (AZPROMO) və Kiçik və Orta Biznesin İnkişafı Agentliyinin (KOBİA) birgə təşkilatçılığı ilə bu gün sahibkarlarla görüş keçiriləcək. Məlumata görə, görüş Azərbaycan Nazirlər Kabinetinin 2023-cü il 10 aprel tarixli 102 nömrəli Qərarı ilə “Malların daxildə emal xüsusi gömrük proseduru altında yerləşdirilməsi Qaydaları”nda edilmiş dəyişikliklər, müvafiq gömrük prosedurundan istifadə icazəsinin alınması üçün müraciət edilməsi zamanı tələb olunan sənədlər, eləcə də ümumilikdə qaydalar barədə məlumatlandırma işlərinin aparılması, həmin prosedurdan istifadə edən şəxslərin dairəsinin genişləndirilməsi məqsədilə təşkil edilir.
Bu gün saat 15:00-da "Facebook" və "Instagram" sosial şəbəkələri üzərindən “Azəriqaz” İB rəhbərliyinin növbəti canlı yayımı planlaşdırılır. Siz qaz təsərrüfatına dair istənilən sualla canlı yayımda müraciətlərinizi edə bilərsiniz.
Bu gündən iyunun 11-dək Ümummilli Lider Heydər Əliyevin anadan olmasının 100 illik yubileyinə həsr olunmuş "Əziz Şuşa” beynəlxalq velosiped yarışı keçiriləcək. Şosse velosipedinin qrup ötüşməsi növü üzrə təşkil ediləcək veloturda 16 ölkədən 18 komandanın tərkibində 100-dən çox idmançı medallar uğrunda mübarizə aparacaq. Turnirə bu gün Bakı şəhərinin Səbail rayonunda yerləşən Veloparkdan start veriləcək. İlk mərhələdə velosipedçilər 150 km məsafə qət edərək Şamaxı rayonunda finiş xəttini keçəcəklər.
Bakı Şəhəri üzrə Təhsil İdarəsi tərəfindən reallaşdırılan “Məktəbdə...” layihəsinin növbəti görüşü bu gün Bakı şəhəri 35 nömrəli tam orta məktəbdə keçiriləcək. Layihənin budəfəki qonağı millət vəkili Fazil Mustafa olacaq.
Bu gün İndoneziyada beynəlxalq tərkibdə rəssamların qrup sərgisinin açılışı olacaq. Ayın 30-a qədər keçiriləcək 5-ci Beynəlxalq İncəsənət və Memarlıq Sərgisinə 37 ölkədən 225 rəssamın əsəri seçilib. Azərbaycanı sərgidə istedadlı rəssam Soltan Soltanlı təmsil edir.
Bu gün Üzeyir Hacıbəyli yaradıcılığının ən populyar nümunələrindən biri olan “O olmasın, bu olsun” musiqili komediyası Bakı Musiqi Akademiyasının nəzdində olan Opera Studiyasının səhnəsində nümayiş olunacaq. Rollarda Xalq artistləri Azər Zeynalov, Əkrəm Poladov, Əməkdar artistlər Ramil Qasımov, Gülüstan Əliyeva, Cahangir Qurbanov, Ələkbər Əliyev, Təyyar Bayramov, Tural Ağasıyev, teatrımızın solistləri Günel Hacıyeva, Fəhmin Əhmədli, Xaliq Bəkirov və başqaları çıxış edəcək. Saat 19:00-da başlayacaq tamaşanın dirijoru Əməkdar incəsənət xadimi Sevil Hacıyeva, quruluşçu rejissoru Əməkdar incəsənət xadimi Hafiz Quliyevdir.
Ermənistan Baş naziri Nikol Paşinyan bu gün Soçiyə səfər edəcək. Bu barədə erməni mətbuatı məlumat yayıb. Məlumata görə, iyunun 7-9-da baş tutan səfər zamanı Paşinyan Avrasiya İqtisadi Birliyinin hökumət başçıları iclasında iştirak edəcək.
Türkiyə Böyük Millət Məclisinə yeni sədr seçkisi bu gün keçiriləcək. Bu məqsədlə Türkiyə Böyük Millət Məclisi bu gün saat 14:00-da toplanacaq.
Rusiya Federasiya Şurası (RFŞ) bu gün Ukrayna ilə Azov dənizi və Kerç boğazından istifadə sahəsində əməkdaşlıq haqqında sazişin ləğvi məsələsinə baxacaq.
ABŞ-ın sabiq respublikaçı vitse-prezidenti Mayk Pens 2024-cü il Prezident seçkiləri üçün namizədliyini irəli sürəcək. Pens bu gün Ayova ştatından seçki kampaniyasına başlayacaq. Nəticədə, Donald Trampın prezidentliyi dövründə onun əsas müttəfiqlərindən olmuş Pens gələnilki seçkilərdə onun rəqibi kimi iştirak edəcək.
UEFA Konfrans Liqasında bu gün final görüşü keçiriləcək. Həlledici matçda İtaliya "Fiorentina"sı İngiltərə "Vest Hem"i ilə üz-üzə gələcək. Oyun 23:00-da Çexiyanın paytaxtı Praqadakı "Eden Arena"da keçiriləcək.
