İqtisadiyyat.az bu gün baş verəcək hadisələrin siyahısını təqdim edir. 

Bu gün Milli Məclisin növbədənkənar sessiyasının ilk iclası keçiriləcək. İclasın gündəliyinə 14 məsələnin müzakirəsi daxil edilib. “Azərbaycan Respublikasının 2023-cü il dövlət büdcəsi haqqında” qanunda dəyişiklik edilməsi barədə qanun layihəsi birinci oxunuşda müzakirə olunacaq. 

SOCAR-ın “Azəriqaz” İstehsalat Birliyinin (İB) “Açıq mikrofon”u növbəti dəfə Xaçmaz rayonunda qurulacaq. Bu gün saat 11:00-dan 12:00-dək “Azəriqaz” İB-nin “Açıq mikrofon” aksiyası Xaçmaz rayonunun Qımılqışlaq kəndində baş tutacaq. Vətəndaşlar qeyd olunan ünvana yaxınlaşaraq qaz təchizatı ilə bağlı problem və təkliflərini ifadə edə bilərlər.

Bu gün Macarıstanın Eqer şəhərində gənc oğlan və qız boksçular arasında beynəlxalq turnir start götürəcək. 4 gün davam edəcək yarışda Azərbaycan millisi də iştirak edəcək. 

"Buxarest doqquzluğu" ölkələrinin (Bolqarıstan, Macarıstan, Latviya, Litva, Polşa, Rumıniya, Slovakiya, Çexiya, Estoniya) prezidentləri bu gün Bratislavada görüşəcək. Bu barədə Slovakiya dövlət başçısının mətbuat katibi Martin Strijinets jurnalistlərə bildirib. Onun sözlərinə görə, iyulda Vilnüsdə keçiriləcək NATO sammiti öncəsi mövqelərini əlaqələndirmək üçün bu gün "Buxarest doqquzluğu" ölkələrinin liderləri Bratislavada bir araya gələcək.
 
Türkiyə Prezidenti Rəcəb Tayyib Ərdoğan bu gün yeni hökumətin ilk iclasını keçiriləcək. 

Türkiyənin "Trabzonspor" klubunda çıxış edən Marek Hamşik karyerasını başa vurur. 36 yaşlı yarımmüdafiəçi bu barədə mətbuat konfransında bildirib. Slovakiyalı oyunçu bu gün “Başakşehir” klubuna qarşı keçirəcəyi oyundan sonra futbolla vidalaşacaq. 

Bu gün həmçinin “Real Madrid” klubu Benzema ilə vida mərasimi təşkil edəcək. 

Bu gün Fransada ölkə boyu pensiya islahatına qarşı nümayişlər keçiriləcək. Ölkənin Daxili İşlər naziri asayişi təmin etmək üçün 11 min polis və jandarm göndərəcək.

İranın Xarici İşlər nazirliyi bu gün İran İslam Respublikasının Ər-Riyadda səfirliyinin fəaliyyətinin bərpa olunacağı barədə məlumatı təsdiqləyib.