İqtisadiyyat.az bu gün baş verəcək hadisələrin siyahısını təqdim edir. 

İsrail Prezidenti İshaq Hersoq bu gün Azərbaycana gələcək. Yaxın Şərq ölkəsi başçısının səfəri iki gün davam edəcək. Rəsmi şəxslərdən əlavə, Hersoq Azərbaycanın yəhudi icmasının nümayəndələri ilə görüşməyi və İsrailin müstəqilliyinin 75-ci ildönümünə həsr olunmuş xüsusi tədbirdə iştirak etməyi planlaşdırır. 

Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev və Ermənistan Təhlükəsizlik Şurasının katibi Armen Qriqoryan bu gün qlobal təhlükəsizlik problemlərinə həsr olunmuş “GLOBSEC 2023 Bratislava Forum”u beynəlxalq tədbiri çərçivəsində panel müzakirələrində iştirak edəcəklər.

Bu gün Milli Məclisin növbəti plenar iclası keçiriləcək. İclasın gündəliyinə isə 28 məsələ daxil edilib.

Milli Məclisin deputatı Rafael Hüseynov Avropa Şurası Parlament Assambleyasının (AŞPA) Mədəniyyət, elm, təhsil və media komitəsinin iclasında iştirak etmək üçün bu gün Böyük Britaniyanın London şəhərinə səfər edəcək. Tədbirdə idmanda və idman vasitəsilə insan hüquqlarının qorunması, idmanda zorakılıq hallarının müəyyən edilməsi və onların aradan qaldırılması, virtual məkanda imkanlar, mövcud risklər və bir sıra digər məsələlərlə bağlı müzakirələr aparılacaq.

Bu gün Azərbaycan-Fransız Universitetində (UFAZ) Ümummilli Lider Heydər Əliyevin 100 illik yubileyinə həsr olunan “Azərbaycan və Avropa İttifaqı arasında münasibətlərin qurulmasında Ulu Öndər Heydər Əliyevin rolu” mövzusunda elmi-praktik konfrans keçiriləcək.

Ümummilli lider Heydər Əliyevin 100, Azərbaycan peşəkar milli teatrının yaranmasının 150 illiyinə həsr edilmiş silsilə tədbirlər çərçivəsində regionlara təşkil olunan qastrol səfərlərinə Azərbaycan Dövlət Akademik Rus Dram Teatrı da qoşulub. Yaradıcı kollektiv Şəki Dövlət Dram Teatrında bu gün “Sehrli karusel” tamaşasını nümayiş etdirəcək.

Azərbaycanda bir neçə dövlət qurumunun balansında olan bəzi nəqliyyat vasitələri hərrac yolu ilə satışa çıxarılır. Əmlak Məsələləri Dövlət Xidməti tərəfindən təşkil ediləcək hərrac bu gün baş tutacaq. 25 nəqliyyat vasitəsi satışa çıxarılacaq. Nəqliyyat vasitələrindən ən ucuzu QAZ-31029 minik avtomobilidir. O 500 manata satışa çıxarılacaq.Hərraca çıxarılan nəqliyyat vasitələri arasında diqqəti çəkən əsas məqam “Bakı Beynəlxalq Dəniz Ticarət Limanı” QSC balansında olan “Elxan Kazımov” gəmisidir.

Bu gün Bakıda dünyanın aparıcı su mütəxəssislərinin və ekoloqlarının iştirakı ilə II Xəzər Su İnnovasiya Forumu keçiriləcək. “Gələcək üçün su!” şüarı ilə baş tutacaq builki foruma qeyd olunmuş sahələr üzrə 15 ölkədən 26 aparıcı şirkət, o cümlədən 60-dan çox beynəlxalq səviyyəli peşəkar mütəxəssis qatılacaq. 

ABŞ dövlət katibi Entoni Blinken bu gün İsveçə səfər edəcək. Bu barədə İsveç hökuməti məlumat yayıb.