İqtisadiyyat.az bu gün baş verəcək hadisələrin siyahısını təqdim edir.
Şuşa və Ağdam şəhərlərinə təşkil olunan müntəzəm avtobus reyslərinə iyun ayına olan biletlər bu gün saat 12:00-da satışa çıxarılacaq. Bilet satışı www.yolumuzqarabaga.az portalı üzərindən onlayn qaydada həyata keçirilir. Sərnişinlər gediş və qayıdış biletlərini əvvəlcədən eyni vaxtda sifariş etməlidirlər.
Milli Məclisin Azərbaycan-Litva parlamentlərarası əlaqələr üzrə işçi qrupunun rəhbəri Nəsib Məhəməliyev və qrupun üzvü Rasim Musabəyov bu gün Litvanın paytaxtı Vilnüs şəhərinə səfər edəcəklər. Deputatlar burada Azərbaycanın 28 May – Müstəqillik Günü ilə bağlı keçirilən tədbirlərdə iştirak edəcək, həmçinin Litva Seymində həmkarları ilə görüşlər keçirəcəklər. Səfər iyunun 2-də başa çatacaq.
Bu gündən Bakıda taekvondo üzrə dünya çempionatı start götürür. Bakı Kristal Zalında keçiriləcək döyüşlərə saat 09:00-da start veriləcək. Yarışda yarımfinal görüşləri isə saat 18:30-da başlayacaq. Qeyd edək ki, dünya çempionatına 145 ölkədən 949 taekvondoçu qatılıb. Mundialın rəsmi açılış mərasimi saat 16:30-da start götürəcək. Yarış iyunun 4-dək davam edəcək.
Mədəniyyət Nazirliyi tərəfindən Ümummilli lider Heydər Əliyevin 100, Azərbaycan peşəkar milli teatrının yaranmasının 150 illiyi münasibətilə həyata keçirilə silsilə tədbirlər çərçivəsində teatr və konsert müəssisələrinin regionlarda qastrol səfərləri davam edir. Azərbaycan Dövlət Gənc Tamaşaçılar Teatrı da sənət aksiyasına qoşulub. Yaradıcı kollektiv bu gün Gəncə Dövlət Dram Teatrında Anton Çexovun “Qağayı” tamaşasını nümayiş etdirəcək. Qastrol səfərləri çərçivəsində Azərbaycan Dövlət Akademik Rus Dram Teatrının kollektivi isə Şəki Dövlət Dram Teatrının qonağı olacaq. Rus Dram Teatrı şəkili teatrsevərlərə mayın 29-da Anarın “Mən, sən, o və telefon”, mayın 30-da isə “Sehrli karusel” tamaşasını nümayiş etdirəcək.
Bu gün Heydər Əliyev Sarayında bir çox müsabiqələrin mükafatçısı, gənc ifaçı Almaxanım Əhmədlinin ilk böyük solo konserti keçiriləcək. Konsertdə Almaxanım öz repertuardakı mahnılarla yanaşı muğamlar, xalq və bəstəkar mahnılarınıda səsləndirəcək. Konsert saat 20:30-da başlanacaq.
Türkiyəli məşhur müğənni Sılanın da bu gün Bakıda konserti baş tutacaq. Konsert saat 20:00-da başlayacaq və Bakı Konqress Mərkəzində keçiriləcək.
Türkiyədə prezident seçkilərinin ikinci turu ilə əlaqədar bu gün məktəblərdə dərs olmayacaq.
Bu gün Rumıniyada 13 ölkədən 10 min hərbçinin iştirak edəcəyi NATO-nun genişmiqyaslı “Saber Guardian-23” təlimləri başlayacaq. Çoxmillətli təlimlərdə Rumıniyanın 5 mindən çox hərbçisi, 1,7 mindən çox texniki vasitə olmaqla, 13 müttəfiq və tərəfdaş ölkədən ümumilikdə 10 minə yaxın hərbçi iştirak edəcək. Bu, cari il üçün planlaşdırılanların ən böyük və mürəkkəb təlimdir.
Mayın 24-də Sakit okeanın Quam adasında başlayan “Mavar” tayfunu Yaponiyaya doğru irəliləyərək bu gün Okinavanın cənub prefekturasına çata bilər. Bu barədə Yaponiya Milli Meterologiya İdarəsi bildirib.
