NASA layihələri üçün sənədli filmlər çəkən britaniyalı professor Saymon Holland iki astronom qrupunun qalaktikada - Süd Yolunda yadplanetli sivilizasiyaların mövcudluğunu göstərən əlamətləri aşkar etdiyini bildirib.
İqtisadiyyat.az xəbər verir ki, bu barədə alim Britaniyanın “The Mirror” tabloidinə danışıb.
Araşdırmaçının sözlərinə görə, o, məlumatları yadplanetli ağıllı varlıqların mövcudluğunu araşdırmaq məqsədi daşıyan xüsusi təşəbbüs - "Breakthrough Listen" layihəsindən əldə edib.
Holland iddia edir ki, bu sensasiyalı kəşfin müəllifləri yaxın bir ay ərzində rəsmi açıqlama verəcəklər. O, Oksford Universitetindən olan astronomların texnogen mənşəli yadplanetli siqnallarının mövcudluğuna dair sübutlara malik olduqlarını qeyd edib.
Alim əlavə edib ki, Çin mütəxəssisləri britaniyalı həmkarlarını geridə qoyaraq yadplanetli sivilizasiyaların mövcudluğunu ilk sübut edənlər ola bilərlər. Çünki onlara ehtimal edilən obyekt - "BLC-1" adlı cismin koordinatları məlumdur.
Saymon Holland "BLC-1"dən gələn siqnalların hər hansı digər məlum kosmik hadisə və ya fenomenə bənzəmədiyini dəqiqləşdirib.
