Böyük Britaniyanın Azərbaycanda qızıl, gümüş və mis hasil edən şirkəti “Anglo Asian Mining PLC” şirkəti bu ilin ilk rübü üzrə göstəricilərini açıqlayıb.

İqtisadiyyat.az xəbər verir ki, hesabat dövründə şirkət 2,548 qızıl unsiya ekvivalentində (GEOs) qiymətli metal hasil edib. Bu da ötən ilin eyni dövrünə nisbətən 76,7% azdır. 2023-cü ilin ilk rübündə bu rəqəm 10,969 unsiya təşkil edib.

"Anglo Asian" bu ilin birinci rübündə 2,252 unsiya qızıl hasil edib ki, bu da ötən ilin eyni dövrünə nisbətən 3 dəfəyə yaxın azdır (2023-cü ilin I rübündə 6,741 unsiya qızıl).

Şirkətin mis hasilatı son bir ildə 847 tondan 54 tona düşüb. Gümüş hasilatı isə 2023-cü ilin ilk rübündəki 22,566 unsiyadan bu ilin birinci rübündə 6,410 unsiyaya qədər azalıb.