Böyük Britaniyanın pul vahidi olan funt sterlinqin dəyəri ölkə hökumətinin borclanma xərclərinin artması səbəbindən son 14 ayda ən aşağı həddinə enib.

İqtisadiyyat.az bu barədə "İRNA"ya istinadən xəbər verir.

Məlumata görə, bu gün maliyyə bazarlarında 1 funt sterlinqinin dəyəri 1,226 dollara enib ki, bu da 2023-cü ilin noyabrından bəri ən aşağı məzənnədir.

Eyni zamanda, Britaniyanın 10 illik istiqrazlarının gəlirliliyi 4,89%-ə çatıb ki, bu da 2008-ci ildən bəri ən yüksək səviyyədir. Bu dövrdə 30 illik istiqrazların gəlirliliyi də 5,39%-ə yüksəlib ki, bu da 1998-ci ildən bəri ən yüksək göstəricidir. İstiqraz gəlirlərinin artması dövlətin borclanma xərclərinin artması deməkdir. Bu o deməkdir ki, hökumət öz borclarını maliyyələşdirmək üçün investorlara daha yüksək faiz ödəməlidir.

İqtisadiyyat ekspertləri hesab edir ki, funtun belə ucuzlaşması daxili və qlobal amillərin birləşməsinin nəticəsidir. Bir tərəfdən İngiltərədə iqtisadi tənəzzül və sabit inflyasiya ilə bağlı narahatlıqlar bazarlarda inamsızlıq yaradıb. Digər tərəfdən, qlobal bazarlarda ABŞ dollarının möhkəmlənməsi funt daxil olmaqla, digər valyutalara daha çox təzyiq göstərib.

 

Gözəl Həşimova