Avropa İttifaqının (Aİ) Xarici İşlər və Təhlükəsizlik Siyasəti üzrə Ali Nümayəndəsi Cozep Borrell Brüsseldə keçirilən görüşdə icmanın xarici işlər nazirlərinə İsrail hökumətinin iki nazirinə qarşı sanksiyalar tətbiq etməyi təklif edib, lakin hələlik razılıq əldə olunmayıb.

İqtisadiyyat.az xəbər verir ki, o bu barədə Aİ-nin 27 ölkəsinin xarici işlər nazirlərinin Brüsseldə keçirilən qeyri-rəsmi görüşündən sonra keçirilən mətbuat konfransında bildirib.

"İnsan hüquqlarının pozulmasına görə İsrail nazirlərinə qarşı sanksiyaların tətbiqi təklifini nazirlərin və texniki xidmətlərin masasına qoymuşam, əlbəttə ki, hələlik yekdil fikir yoxdur, amma nazirlər siyasi qərar qəbul edəcəklər", - Borrell qeyd edib. 

Onun sözlərinə görə, xarici işlər nazirlərinin görüşündə İsrail nazirlərinə qarşı sanksiyaların tətbiqinə qarşı çıxan ölkələr olub, lakin yekdilliyə nail olmaq üçün işlər davam etdiriləcək.