Artan istehsal xərcləri, ABŞ-nin tarifləri və rəqabət səbəbindən Almaniyanın avtomobil sənayesinin gələcəyi ilə bağlı narahatlıqlar artdıqca, üç böyük avtomobil istehsalçısının mənfəəti bu ilin birinci rübündə azalıb.

İqtisadiyyat.az dünya mediasına istinadən xəbər verir ki, bir vaxtlar Almaniya iqtisadiyyatının dayağı və texnoloji innovasiyanın simvolu kimi görünən Almaniyanın avtomobil sektoru struktur, texnoloji və geosiyasi problemlərlə üzləşir, eyni zamanda Çində və ABŞ-də satışların azalması bu sektorun mənfəətinə də təsir edir.

Almaniyanın lüks avtomobil istehsalçıları "Mercedes-Benz", "BMW" və "Volkswagen Group"un birinci rübdə mənfəətləri müvafiq olaraq 40,7 faiz, 25,2 faiz və 37 faiz azalıb.

Dünyanın ən böyük yeni avtomobil bazarı olan Çin alman istehsalçıları üçün böyük problemlər yaradır. "Mercedes S-Class", "BMW 7 Series" və ya "Audi A8" kimi daxili yanma mühərrikli dəbdəbəli sedanlar Çində daha az alıcı tapır.

İlk rübdə "Volkswagen", "BMW" və "Mercedes" markaları Çinə 1 milyon avtomobil belə çatdıra bilməyib.

Yanvar-mart ayları arasında "Mercedes-Benz"in Çinə avtomobil tədarükü 10 faiz azalaraq 152 800-ə, "BMW"nin avtomobil tədarükü 17,2 faiz azalaraq 155 195-ə, "Volkswagen"in tədarükü isə 7,1 faiz azalaraq 644,10-a düşüb.

 

Gözəl Azadəliyeva