İsrail və HƏMAS qruplaşması arasında davam edən müharibə nəticəsində infrastruktur və binaların dağıldığı Qəzzada 37 milyon ton dağıntının təmizlənməsi 14 il çəkə bilər.

İqtisadiyyat.az xəbər verir ki, bu barədə Birləşmiş Millətlər Təşkilatının (BMT) Minalarla Mübarizə Xidməti məlumat yayıb.

Məlumata görə, dünyanın ən sıx məskunlaşdığı bölgələrindən biri olan Qəzzada dağıntıların təmizlənməsi uzun zaman alacaq.

Bildirilib ki, Qəzzada 360 min ev tamamilə və ya qismən dağılıb. Bu tikililərin yaşayış üçün yararsız hala düşdüyü sənədləşdirilir.

Hücumlarda Qəzza zolağında 171 hökumət mərkəzi və 100 təhsil müəssisəsi tamamilə, 305-i isə qismən dağıdılıb. Bombaların hədəfi olan 229 məscid tamamilə dağıdıldığı halda, 297 məscid qismən zədələnib. Bundan əlavə, hücumlar nəticəsində 3 kilsə dağıdılıb.

Dünya Bankı və BMT-nin hesabatlarına görə, Qəzza zolağında infrastruktura edilən hücumlar nəticəsində dəyən ziyan təxminən 18,5 milyard dollardır.

 

Gözəl Həşimova