ABŞ dövlət katibi Antoni Blinken 75 illik yubileyini qeyd edən NATO-nun həmişəkindən daha güclü, daha böyük olduğunu və birləşdiyini vurğulayıb.

İqtisadiyyat.az xəbər verir ki, NATO-nun baş katibi Yens Stoltenberq və Blinken Brüsseldə keçirilən NATO Xarici İşlər Nazirləri Toplantısının ilk gün sessiyalarının sonunda birgə bəyanatla çıxış ediblər.

NATO-nun əhəmiyyətinə və çətin anlarda birlik olaraq möhkəm dayana bilmə qabiliyyətinə işarə edən Blinken deyib: "Bizim ittifaqımız indi əvvəlkindən daha güclü, daha böyükdür və birləşib".

NATO-nun ildönümünü qeyd etməyə başladıqlarını, lakin indi qarşıdakı 75 ilə baxdıqlarını qeyd edən Blinken, NATO-nun güclü yolunu davam etdirməsi üçün çalışdıqlarını vurğulayıb.

İttifaq üzvlərinin hər zaman bir-birinin arxasında olduğunu və bunun onların əsas prinsipləri olduğunu qeyd edən Blinken, ittifaqa yönələ biləcək hər cür təhdidin qarşısını almaqda qərarlı olduqlarını bildirib.

"Bu proses daim yenilənmə tələb edir. Hər kəs öz üzərinə düşəni etməlidir ki, alyans təkcə ötən 75 ilin problemlərini həll etmək üçün deyil, həm də bu gün üzləşdiyimiz yeni çağırışlara cavab vermək üçün lazımi imkanlara malik olsun", - Blinken Rusiyaya qarşı Ukraynanı dəstəkləməkdə qərarlı olduqlarını vurğulayıb.

İyulda ABŞ-nin paytaxtı Vaşinqtonda keçiriləcək NATO Sammitinə yaxşı hazırlaşdıqlarını bildirən Blinken bu sammitlə alyansın ruhunun daha da güclənəcəyini qeyd edib.