“Bir sıra xarici dövlətlərin Azərbaycana qarşı riyakar mövqeyi həqiqətən absurd və qəbuledilməzdir. Eyni zamanda həmin riyakarların cavabı anındaca verilməli və bu məkrli qüvvələr layiq olduqları formada susdurulmalıdır. Cənab Prezident də son müsahibəsində məlum mövzuya məxsusi toxundu və Makron kimi hərdəmxəyalları, Qərbin inqilab dəzgahlarının üzərində oturanları və nəhayət Azərbaycanda müxalifət adı ilə “müxüfunət" funksiyası həyata keçirən bədxahların hamilərini sözün gerçək anlamında ifşa etdi”.
İqtisadiyyat.az xəbər verir ki, bu fikirləri Demokratik Maarifçilik Partiyasının sədri, Milli Məclisin deputatı Elşən Musayev bildirib.
O bildirib ki, nadanlıq – etiologiyası, mənşəyi məlum olmayan xəstəlikdir və nə yazıq ki, müasir dövrdə bir sıra ölkələr ard-arda bu xəstəliyə yoluxmaqdadır: “Hər halda belə olmasaydı, 27 saatlıq uçuş məsafəsində qərarlaşan bir ada dövlətini öz müstəmləkəsinə çevirənlər bu gün bizə insan hüquqları haqda utanmadan, qızarmadan moizə oxumazdılar. Belə olmasaydı, Meydan TV, Toplum TV, Abzas Media kimi zərərli və zəhərli təsisatların yaradıcıları bu gün öz məmləkətlərində öz emissarlarına, “verbovka”larına abırsızca mükafat paylamazdılar. Belə olmasaydı, Beynəlxalq hüququn anasını ağlar günə qoyanlar, BMT Nizamnaməsindəki tələbləri kom şəklində genosidə uğradanlar bu gün bizimlə humanitar hüquq normalarının qorunma zərurəti barədə danışmazdılar. Ən nəhayət - belə olmasaydı, ölüm hökmünü hələ də ölkəsinin 27 faizlik ərazisində tətbiq edənlər hazırda bizimlə erməni canişinlərin Bakıda necə saxlanılması ilə bağlı polemikalar açmaz, Xocalı miqyasında soyqırımın baiskarları ilə bu qədər içdən, bu qədər canfəşanlıqla maraqlanmazdılar”.
Elşən Musayev son günlər ard-arda açıqlamalar verən ABŞ və Fransa səfirləri barədə də danışıb: “Amerika diplomatı bəyan edir ki, Azərbaycanda jurnalistlər həbs olunub. Xeyr, cənab səfir! Azərbaycanda jurnalistlər deyil, Qərbin maliyyələşdirdiyi və xəfiyyə, casus kimi ölkəmizə göndərdiyi cinayətkarlar həbs olunub. Lütfən, cümləni düzgün quraq, kontekst itməsin. Fransa səfirinin söylədiklərinə gəlincə isə, bu adam özünü zaman-zaman gah vəkil kimi aparıb, gah prokuror, gah da hakim. Bircə statistika komitəsinin sədri kimi aparmamışdı, dünən bunu da elədi. Hərgah, xanım Boayanın qulağına arada pıçıldamaq lazım ki, sən səfirsən. Bir qulağı eşitməsə o biri qulağına pıçıldamaq lazım ki, sən səfirsən. Özü inanmasa da kimsə onu inandırmalıdır ki, sən səfirsən və səlahiyyətinə aid olmayan məsələlərlə bağlı şərh və ya məsləhət vermək nə sənə düşər, nə də səndən heç bir fərqi olmayan Emanuelə!