Azərbaycanda bir sıra şirkətin fəaliyyətində nöqsanlar aşkarlanıb.

İqtisadiyyat.az xəbər verir ki, "Azerfloat", "Metal Trade", "Can Aqro Tarım Qida Sənaye Ticarət", "İkar-Qrup", "Elm Galaxy" və "Məkan Təminat" şirkətlərinin valyuta tənzimi qaydalarını pozduğu məlum olub.

Buna görə də Azərbaycan Mərkəzi Bankı (AMB) qeyd olunan şirkətlərin hər biri barəsində ayrı-ayrılıqda İnzibati Xətalar Məcəlləsinin 430.4-cü maddəsinə əsasən cərimə protokolu tərtib edib.

Daha sonra protokollar baxılması üçün müvafiq olaraq məhkəmələrə göndərilib. 

Qeyd edək ki, İXM-nin 430-4-cü maddəsinə əsasən, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir.