Bərdədə türkiyəli körpə nadir xəstəliyə görə əməliyyat olunub.
Bərdə Rayon Mərkəzi Xəstəxanasından İqtisadiyyat.az-a bildirilib ki, bu ilin oktyabrın 24-də doğulmuş Efekaan Develi Özgür oğlu noyabrın 26-da pilorostenoz diaqnozu ilə tibb müəssisəsinə yerləşdirilib.
Ona zəruri tibbi xidmətlər göstərilib. Pediatrik cərrahiyyə bölməsinin müdiri, uşaq cərrahı Ramiz Əhmədov tərəfindən azyaşlı üzərində piloromiatotomiya əməliyyatı icra olunub.
Hazırda azyaşlının vəziyyəti stabildir, müalicəsi davam etdirilir.
Qeyd edək ki, pilorostenoz - mədənin pilorik hissəsinin əzələ qatının hipertrofiyasıdır. Bu zaman qalınlaşmış əzələ qatı pilorusu tam qapadığına görə, insanda fəvvarəşəkilli qusmalar başlayır. Qusma sağlam yenidoğulan uşaqların həyatının 3-4-cü həftələrində qəflətən özünü büruzə verir. Bu zaman qusmanın miqdarı qəbul olunan qidadan çox olur. Xəstəlik hər 1000 yenidoğulandan 2-3-də rast gəlinir. Oğlanlarda xəstəliyin rastgəlmə tezliyi qızlara nisbətən 2-5 dəfə yüksəkdir.
Pilorostenoz xəstəliyi özünü həm tez, həm də gec biruzə verə bilər. Əksər hallarda xəstəyə vaxtında düzgün diaqnoz qoyulmadığından, bundan əziyyət çəkənlər ağır dərəcəli hipotrofiya ilə həkimlərə müraciət edirlər. Pilorostenoz cərrahi xəstəlikdir və müalicəsi yalnız cərrahi üsulla mümkündür.
