Mayın 22-də “Rusiyanın Azadlığı” legionu və “Rusiya Könüllüləri Korpusu”nun Rusiyanın Belqorod vilayətində keçirdiyi əməliyyat başa çatıb.

İqtisadiyyat.az xəbər verir ki, bu barədə sözügedən hərbi birliklərin bir qrup hərbçisi və komandir heyəti Ukraynanın şimalındakı yaşayış məntəqələrindən birində keçirdiyi brifinqdə məlumat verib.

Onların sözlərinə görə, əməliyyat zamanı vilayətin 42 km dərinliyinə qədər irəliləmək mümkün olub: "Hazırda əməliyyatın aktiv mərhələsi başa çatıb. Amma proses davam edir" - deyə "Rusiya Könüllüləri Korpusu"nun komandiri Denis Nikitin keçirilən brifinqdə məlumat verilib. Onun sözlərinə görə, korpus və legion cüzi itkilərlə (iki ölü, 10 yaralı) əməliyyatı başa çatdırıb. 

D.Nikitin keçirdikləri əməliyyat zamanı zirehli texnika və silah-sursat qənimət götürdüklərini də vurğulayıb. 

Qeyd edək ki, Rusiya tərəfi bu əməliyyatda Ukrayna Silahlı Qüvvələrini ittiham edib və baş verənləri terror aktı kimi qiymətləndirib. Ukrayna Prezident ofisi isə Rusiyanın Belqorod vilayətində baş verən hadisələrdə Ukrayna Silahlı Qüvvələrinin iştirakını təkzib edib.