Belarusda dini qurumların bir il ərzində siyasi fəaliyyətlə məşğul olması qanunvericilik səviyyəsində qadağan olunacaq. Bununla yanaşı, bütün dini qurumlar yenidən qeydiyyatdan keçməlidirlər.

İqtisadiyyat.az xarici KİV-lərə istinadən xəbər verir ki, bu, iyulun 6-dan qüvvəyə minəcək “Vicdan azadlığı və dini qurumlar haqqında” qanunun yeni redaksiyasında nəzərdə tutulub.

Dini qurumlara siyasi partiyaların fəaliyyətində iştirak etmək, onlara maliyyə və digər dəstək göstərmək qadağan ediləcək.

“İbadət yerlərində dini simvollardan başqa hər hansı rəmzdən istifadə etmə, yığıncaq, mitinq, piket, seçkiqabağı təşviqat və digər siyasi tədbirlər, müharibə, sosial, milli, dini və irqi düşmənçiliyin təbliği, digər ekstremist fəaliyyət, habelə çıxışlar, müraciətlər, dövlət orqanlarının nümayəndələrini, vəzifəli şəxsləri və ayrı-ayrı vətəndaşları, başqa dinlərin nümayəndələrini və onların ardıcıllarını təhqir etmək qadağandır”, - qanunda deyilir.

Qanun dini qurumların yaradılması və dövlət qeydiyyatına alınması qaydalarını da tənzimləyir.

Dəyişikliklərin qüvvəyə mindiyi tarixdən bir il ərzində dini qurumlar yenidən qeydiyyatdan keçməlidirlər.

Sadiq Cavadov