ABŞ prezidenti Co Bayden həftəsonunu keçirdiyi Delaverdən Ağ Evə planlaşdırıldığı kimi bazar günü deyil, şənbə günü qayıdacaq.
İqtisadiyyat.az xəbər verir ki, bu barədə Ağ Evin mətbuat xidməti məlumat yayıb.
"Prezident Bayden Yaxın Şərqdəki hadisələrlə bağlı milli təhlükəsizlik komandası ilə məsləhətləşmək üçün şənbə günü Ağ Evə qayıdacaq", - məlumatda qeyd edilib.
Cümə günü Bayden Vaşinqtondan ənənəvi olaraq həftə sonunu keçirdiyi Delaver ştatının Rehoboth Beach-dəki iqamətgahına gedib.
Məlumatda Yaxın Şərqdə hansı hadisələrin müzakirə olunduğu dəqiq göstərilmir.
Şənbə günü İranın İRNA xəbər agentliyi məlumat verib ki, İslam İnqilabı Keşikçiləri Korpusunun (SEPAH, İran Silahlı Qüvvələrinin elit bölmələri) dəniz qüvvələri Hörmüz boğazında "MSC Aries" ticarət gəmisini ələ keçirib. "Associated Press"in məlumatına görə, "MSC Aries" konteyner gəmisi Portuqaliya bayrağı altında üzüb.
