“Corc Buş dövründən Azərbaycan və ABŞ arasındakı münasibətlər normal məcrada davam edirdi. Təəssüflər olsun ki, Bayden hakimiyyətə gələndən sonra Bayden-Blinkin cütlüyü bu münasibətlərin üstündən xətt çəkdilər və çox zərərli bir siyasi həyata keçirməyə başladılar”.
Bunu İqtisadiyyat.az-a açıqlamasında Milli Məclisin deputatı Vüqar İskəndərov deyib.
O qeyd edib ki, konkret olaraq ABŞ Azərbaycana və Ermənistana münasibətdə qərəzli mövqe nümayiş etdirdi: “Yəni Azərbaycanın 44 günlük Vətən müharibəsindəki qələbəsindən sonra bölgədə yeni siyasi mənzərə formalaşdı. Cənubi Qafqazın lider ölkəsi olan Azərbaycanın suverenliyini bərpa etdikdən sonra Ermənistanla sülh müqaviləsinin imzalanması üçün təşəbbüs irəli sürdü. Lakin burada Ermənistanın qeyri-konstruktiv rolu və bu münasibətə ABŞ-nin sərgilədiyi münasibət və siyasət qəbuledilməz oldu”.
Deputat söyləyib ki, Bayden və Blinken cütlüyü hər vəchlə müxtəlif vasitələrlə Azərbaycana bu və ya digər formada təsir etməyə çalışıblar: “Onlar açıq-aydın indiki Ermənistan hakimiyyətini, Ermənistanı dəstəkləmək yolunu tutdular. Təbii ki, bu, qəbuledilməzdir və Azərbaycan bu mənada öz haqlı mövqeyini sona qədər müdafiə etdi və biz gördük ki, Bayden-Blinken cütlüyü Azərbaycanın bu gedişləri qarşısında demək olar ki, heç nə edə bilmədilər”.
“Artıq hakimiyyətdə Donald Trampdır. Trampın siyasəti demokratların siyasətindən kəskin fərqlənir və ölkə başçısı öz çıxışında Trampın əvvəlki prezidentliyi dövründə yaxşı münasibətin olduğunu qeyd etdi və ümid etdiyini bildirdi ki, bu dəfə də Tramp həm Cənubi Qafqaza mövqeyində, həm konkret Azərbaycana mövqeyində daha konstruktiv və beynəlxalq hüquqa söykənən siyasət həyata keçirəcək”, - deputat əlavə edib.
Elçin Mehdiyev
