2023-cü ilin birinci yarım ili ərzində vətəndaş məmnunluğunun təmini istiqamətində minlərlə vətəndaş qəbul edilərək bir sıra məsələlərlə bağlı edilən müraciətlər yerində həll olunmuş, eyni zamanda vətəndaşın şikayəti əsasında cinayət işinə xitam verilməsi haqqında 10, cinayət işi üzrə icraatın dayandırılması haqqında 4 qərarın ləğv edilməsi təmin edilib.
İqtisadiyyat.az xəbər verir ki, bunu Baş prokurorun müavini, II dərəcəli dövlət ədliyyə müşaviri Heydər Məmmədov bildirib.
"Təkcə onu demək kifayətdir ki, bu dövr ərzində ötən illərdən bağlı qalmış qeyri-aşkar şəraitdə törədilmiş 35 qəsdən adam öldürmə cinayətinin Daxili İşlər Nazirliyi, Dövlət Təhlükəsizliyi Xidməti və Penitensiar Xidməti ilə birgə keçirilmiş peşəkar istintaq-əməliyyat tədbirləri ilə açılması təmin edilməklə təqsirli şəxslər ifşa edilib. Qeyd edilməlidir ki, cari ilin ilk 10 ayı ərzində prokurorluq orqanlarında aparılmış istintaq tədbirləri ilə istintaqı tamamlanmış cinayət işləri üzrə xüsusi mülkiyyətə dəymiş 54 milyon 63 min manat məbləğində vurulmuş maddi ziyandan 20 milyon manatdan artıq vəsaitin dövlət büdcəsinə ödənilməsinə nail olunub", - o əlavə edib.
