Banqladeşdə yerli vaxtla gecə yarısı komendant saatı tətbiq olunacaq, lakin avqustun 6-da respublikada bütün dövlət və özəl qurumların açılması planlaşdırılır.

İqtisadiyyat.az xəbər verir ki, bu barədə Banqladeşin İdarələrarası İctimai Əlaqələr Xidməti məlumat yayıb. 

"Komendant saatı bu gecə yarısından (Bakı vaxtı ilə 22:00) sabah səhər saat 06:00-a qədər (Bakı vaxtı ilə 02:00) qüvvədə olacaq", - deyə məlumatda bildirilir.

"Çərşənbə axşamı səhər saatlarından etibarən ölkədəki bütün hökumət, yarı hökumət, muxtar, özəl təşkilatlar, fabriklər, məktəblər, kolleclər, mədrəsələr, universitetlər və bütün təhsil müəssisələri açıq qalacaq", - departament qeyd edib.

Banqladeşdə vəziyyət gərgin olaraq qalır. Minlərlə insan küçələrdə qalır. Yanğın, vandalizm və talan halları qeydə alınıb. Etirazçılar Baş nazirin iqamətgahını dağıdıb, ölkənin qurucusu Şeyx Mucibur Rəhmanın heykəlini dağıdıb və muzeyini yandırıb, parlament binasına, hakim Əvami Liqası partiyasının ofisinə soxulub, bu partiyanın nümayəndələrinin evlərinə, polis bölmələri, həbsxana və aparıcı televiziya kanallarının ofislərinə hücum ediblər.