Bu ilin III rübündə bəzi bankların depozit portfelində azalmalar müşahidə olunub. Bir çox bankın hesabatlarına əsasən, depozit portfelinin ötən ilin müvafiq dövrü ilə müqayisədə ciddi şəkildə azaldığını görmək mümkündür. Mütəxəssislər isə müştərilərin banklara yatırdığı vəsaitləri geri götürməsini müxtəlif səbəblərlə əlaqələndirirlər.

Bank məsələləri üzrə ekspert Əkrəm Həsənov İqtisadiyyat.az-a açıqlamasında bunun ən böyük səbəblərindən biri kimi vəsait yatıranlara təcili pul lazım olduğunu ehtimal edib.

Onun sözlərinə görə, digər tərəfdən, fiziki və ya hüquqi şəxslər bəzən depozitlərini konkret bank sistemindən çıxarmır, sadəcə olaraq bir bankdan digərinə yatırmağa üstünlük verirlər:

“Burada səbəb müxtəlif ola bilər: müştərilər ya o banka artıq etibar etmirlər, ya da digər bankın şərti onlara daha uyğundur. Çünki ola bilər ki, hansısa bank onların hazırda depozit qoyduğu bankdan daha yaxşı faiz verə bilər. Buna görə də depozitlərini birincidən geri alaraq digərinə yatırırlar”.

“Yeri gəlmişkən, ilk səbəb kimi depozit yatıranlara pul lazım olduğundan vəsaitlərini geri götürdüklərini demişdim. Məsələn, ola bilər ki, banka depozit yatıran şəxs təcili olaraq ev, mənzil və yaxud da avtomobil almaq istəsin. Bu halda o depozitini geri götürə bilər. Amma dediyim kimi, birdən-birə bank sisteminə də etibar etməyə bilərlər. Bu çox az ehtimallardandır. Lakin baş verə biləcək bir haldır”, - Bank məsələləri üzrə ekspert Əkrəm Həsənov əlavə edib.

 

Sadiq Cavadov