Bakıda məcburi köçkünlərin məskunlaşdığı binalarda yanğın nəticəsində zərər görən mənzillər dövlət hesabına təmir ediləcək.

İqtisadiyyat.az-ın əldə etdiyi məlumata görə, Qaçqınların və Məcburi Köçkünlərin İşləri Üzrə Dövlət Komitəsi bununla bağlı hazırlıqlara başa çatdırıb.

Məlumata görə, təmir işləri Binəqədi rayonunun Dərnəgül yaşayış massivi, A.Gəraybəyli küçəsi 39, 4 saylı Fəhlə yataqxanasında 3 ədəd, Nərimanov rayonunin Əhməd Rəcəbli küçəsi 5b ünvanda məcburi köçkünlərin məskunlaşdığı Bakı Peşə məktəbinin yataqxana binasında və Xəzər rayonunun Binə qəsəbəsində məcburi köçkünlərin məskunlaşdığı, 101 saylı Texniki Peşə məktəbinin yataqxana binasında yanmış mənzilləri əhatə edəcək.

Eləcə də Sabunçu rayonunun Bilgəh qəsəbəsi, Qağayı düşərgəsində məskunlaşmış Şuşa rayonundan məcburi köçkün Orucova Almaz Əjdər qızının yanmış mənzilinin təmiri nəzərdə tutulub.

Məlumata görə, təmir işlərini "VK Group N1" və "Tunel-Metro İnşaat" şirkətləri həyata keçirəcək. Dövlət Komitəsi isə təmirlə əlaqədar olaraq şirkətlər arasında ümumi dəyəri 133 min 210 manatlıq müqavilə bağlayıb.