"Problemin kökündə o dayanır ki, ictimai nəqliyyat çox pis işləyir".
İqtisadiyyat.az xəbər verir ki, bunu Qaynarinfo-ya açıqlamasında nəqliyyat eksperti Eldəniz Cəfərov Bakıda taksilərin sayının digər ölkələrdən 4 dəfə çox olmasına münasibət bildirərkən deyib.
Ekspert bunun tamamilə haqlı irad olduğunu bildirib:
"Bu fikirlərlə razıyam. Məsələn, qonşu Gürcüstanda taksi daha azdır. Düzdür, bu məsələdə əhali sayı da önəmlidir. Azərbaycanda əhali sayı çoxdur".
Eldəniz Cəfərov qeyd edib ki, ictimai nəqliyyat daha yaxşı və düzgün işləyən yerlərdə taksiyə ehtiyac qalmır:
"İctimai nəqliyyat vətəndaşlar üçün əlçatan olan yerlərdə sərnişin takisyə ehtiyac duymur. Taksilərdən ancaq həmin şəhərə gələn qonaqlar istifadə edirlər".
Qeyd edək ki, Yerüstü Nəqliyyat Agentliyi İdarə Heyətinin sədri Anar Rzayev Milli Məclisdə keçirilən "Nəqliyyatın idarə edilməsində yeniliklər və çağırışlar" mövzusunda dinləmədə Bakıda taksilərin sayının digər ölkələrdə olan saydan 4 dəfə çox olduğunu vurğulayıb.
