Ekologiya və Təbii Sərvətlər Nazirliyi "TK-KİMYA" Məhdud Məsuliyyətli Cəmiyyətinə cərimə yazıb.

İqtisadiyyat.az xəbər verir ki, nazirlik şirkət barəsində İnzibati Xətalar Məcəlləsinin 239-cu maddəsinə əsasən cərimə protokolu tərtib edib.

Daha sonra protokol baxılması üçün Nərimanov Rayon Məhkəməsinə göndərilib. İş hakim Gültəkin Əsədovanın icraatına verilib.

Protokol tərtib olunan maddədə deyilir ki, ətraf mühitin müəssisə (istehsalat) monitorinqinin, yaxud ekoloji cəhətdən təhlükə törədə bilən təsərrüfat fəaliyyətinin ətraf mühitə təsirinin uçotunun və hesabatının aparılmamasına görə vəzifəli şəxslər iki min beş yüz manatdan üç min beş yüz manatadək məbləğdə, hüquqi şəxslər səkkiz min beş yüz manatdan on min manatadək məbləğdə cərimə edilir.

Qeyd edək ki, "TK-KİMYA" 2015-ci ildə dövlət qeydiyyatına alınıb. Şirkət müxtəlif növ boya istehsalı ilə məşğuldur.