Şəhərin bəzi böyük marketlərində ara-sıra fantastik qiymətə satılan meyvələrə rast gəlirik. Bu günlərdə sosial media platformalarında marketlərdən birində 400 manata alça, 200 manata gilas təklif edildiyini əks etdirən video paylaşılıb. Bəs bu cür qiymətlərin ortaya çıxmasına səbəb nədir?

İqtisadiyyat.az bununla bağlı ilk olaraq supermarketlərlə əlaqə saxlayıb.

“Qiymətlər standart deyil”

“Bazarstore” marketlər şəbəkəsinin PR və Marketinq bölmə müdiri Mahir Həsənov saytımıza bildirdi ki, onlar alça və gilas satışını həyata keçirmirlər, səbəb isə alış qiymətinin baha olmasıdır.

"Rahat" marketlər şəbəkəsinin PR və Marketinq müdiri Kənan Şirinov bildirdi ki, qiymətlər standart deyil, müəyyən məbləğlər arasında dəyişir:

“Bizim mağazalarımızda nə alça, nə də gilas var. Alça tapmaq olur bazarda, amma gilas tapmaq çətindir. Alçanın bazar qiyməti hər kq üçün 100-150 azn arasında dəyişir. Bu da ölçüləri ilə əlaqədardır. Yay aylarına getdikcə alçanın qiyməti də düşəcək”.

“400 manat elə mənim bir aylıq maaşım edir”

Sözügedən məhsulların qiyməti ilə bağlı marketlərdə alıcıların da fikrini öyrəndik. Alıcıların əksəriyyəti bu cür astronomik qiymətli meyvələrdən almadıqlarını bildiriblər. Lakin istisnalar da var:

“Bir dəfə bahalı alça almışam. İki ədəd alçaya 30 manat ödədim. Almağa məcbur idim” – deyir alıcılardan biri. Söhbətimizə qulaq şahidi olan orta yaşlı alıcı isə “400 manat elə mənim bir aylıq maaşım edir. Ona da alça, gilas alım sonra nə edim bəs? İstəsək də ala bilmərik” – deyərək məsələyə belə münasibət bildirib.

“Dövlət orqanları qiymətləri müşahidə və təhlil etməlidir”

Azad İstehlakçılar Birliyinin sədri Eyyub Hüseynov hesab edir ki, bu cür qiymətlərin ortaya çıxmasının bir neçə səbəbi var:

“Bu alçalar istixana şəraitində, müəyyən xərc çəkilərək yetişdirilir. Ümumiyyətlə, hər bir sahibkar istəyir ki, bazara daha tez çıxsın. Məsələn, 1 hektar yemiş əkən şəxs bazara 15 gün əvvəl çıxsa, 10 hektar yemiş əkən şəxsdən daha çox gəlir əldə edəcək. Çünki daha erkən çıxıb bazara. İstehlakçılar tərəfindən də bu məhsula təlabat olduğu üçün, sahibkar bu malı hətta ucuz əldə etmiş olsa belə, bazara baha qiymətə çıxaracaq”.

E.Hüseynov onu da əlavə edib ki, bu mövzuda qiymətlərə müdaxilə mümkünsüzdür:

“Ölkədə qiymət artımı artan templə inkişaf edir. Bu isə tələbin təklifi üstələməsi və məhsul qıtlığı səbəbindən baş verir. Məhsul bol olsa, qiymət aşağı düşəcək. Qiymətə dövlət heç bir halda müdaxilə etməməlidir. Sadəcə dövlət orqanları prosesi müşahidə və təhlil etməlidir”.

Məsələ ilə bağlı saytımıza danışan iqtisadçı Eldəniz Əmirov da bazar iqtisadiyyatında bu cür qiymətlərin meydana çıxmasının normal olduğunu bildirib:

“Biz bazar iqtisadiyyatı modelində yaşayırıq. Hər qiyməti dövlətin tənzimləməsi mümkün deyil, bunu bazar tənzimləyir. İndi gilasın mövsümü deyil, bu meyvəni indi yetişdirə bilmək üçün xüsusi vasitələrdən istifadə edirlər. Yəni məhsulun maya dəyərindən söhbət gedir. Heç kim məcbur deyil ki, 200 manat gilas alıb yesin. Ona görə də, bu qiymət təəccüblü deyil. Əgər may ayında bu qiymətə satıldığını görsək, onda təəccüblü olar”.

Əminə Şahin / İqtisadiyyat.az