Bakı Enerji Həftəsinin “hasilatı” ilbəil artır. Məsələni elə bu cür də ifadə etmək təsadüfi deyil. Çünki harada olmağından asılı olmayaraq Avropanın enerji təhlükəsizliyi dedikdə Bakı, Azərbaycan yada düşür. Hətta uzaq Amerika belə Bakıya yaxındır. Təsadüfi deyil ki, ABŞ prezidenti Co Baydenin azərbaycanlı həmkarı İlham Əliyevi Bakıdakı enerji tədbirinə görə təbrik etdi. Məktubda Azərbaycan gələcək üçün sadiq tərəfdaş adlandırılır.
Avropa İttifaqı rəsmiləri qurumun Azərbaycanla imzaladığı sazişə əməl olunması işinə görə Azərbaycana təşəkkür etdilər. Bu Qafqazın ən böyülk ölkəsi ilə işbirliyinin davam etdirilməsinə işarədir. 
ABŞ-ın “Schlumberger”, Niderlandın “DAMEN Shipyards”,  Çinin “CHINT Electrıc”, Fransanın “TOTAL” və s. dünyanın nəhəng şirkətlərinin Bakıdakı enerji həftəsinə gəlməsi və stendlərlə sərgidə təmsil olunması böyük etimadın göstəricisidir. Bu etimad gələcək üçün nəhəng layihələrin icrasına enerji ötürəcək, yolunu işıqlandıracaq. Bu sadaladıqlarımıza sübut olan hadisəni xatırladaq.

Bakı Enerji Həftəsində açıqlandı ki, yaxın həftələrdə Xəzər dənizinin Azərbaycan sektorundakı “Abşeron” qaz-kondensat yatağından ilk qaz çıxarılacaq. Bu o deməkdir ki, Azərbaycanın qərbə qaz ixracı daha da çoxalacaq. Elə bayaq dediyim nəhəng şirkət, milyardlarla dollar dövriyyəyə malik “Total” bu işdə Azərbaycanla əməkdaşlıq edir. Uzaqgörənliyə diqqət edin, "Abşeron" yatağı üzrə 2009-cu ildə Fransanın "Total" şirkəti ilə Azərbaycan Dövlət Neft Şirkəti arasında "Abşeron" yatağı üzrə kontrakt imzalanıb. 14 il sonra Azərbaycanın daha bir enerji layihəsi bəhrəsini verir. Bunu ona görə qeyd etmək yerinə düşür ki, Bakı Enerji Həftəsində diqqətləri cəlb edir. Bu layihə üzrə yataqda qaz həcmi 350 milyard kubmetrdir. “Abşeron”, Xəzər dənizində "Şahdəniz" yatağından sonra ikinci böyük qaz yatağıdır. 
Deməli, Bakı Enerji Həftəsi ildən-ilə yeni və nəhəng layihələrin reallaşması ilə yadda qalır. Ötən il Bakı Enerji Həftəsində Avropanın qaz təchizatı əsas müzakirə mövzusu idisə, bu il mövzu yeni qaz yatağınından qaz çıxarılmasıdır. Həm də belə bir böyük həcmdə. Belə ardıcıl işlərdən sonra əminliklə deyə bilərik ki, 2024-cü ildəki Bakı Enerji Həftəsinin hasilatı daha böyük həcmdə olacaq.

Samir Cabbarov