Azərbaycan Televiyasının əməkdaşları Fransada silahlı hücuma məruz qalıb.
Bu barədə İqtisadiyyat.az kanalın əməkdaşlarına istinadən xəbər verir.
Telekanalda rejissor vəzifəsini icra edən Şirzad Səmədovun sözlərinə görə, naməlum şəxslər kanalın çəkiliş qrupunu silahla təhdid edib.
Hadisə ilə bağlı Azərbaycan Televiziya və Radio Verilişləri QSC açıqlama yayıb.
Açıqlamada Fransa hökumətinin hüquq mühafizə orqanlarından bu hadisənin obyektiv araşdırılması, jurnalistlərə silahlı hücum edən şəxslərin müəyyənləşdirilərək cəzalandırılması tələb olunur.
Bəyanatı təqdim edirik:
Azərbaycan Televiziya və Radio Verilişləri Qapalı Səhmdar Cəmiyyətinin əməkdaşları Fransada çəkiliş apararkən hücuma məruz qalıblar. Nəticədə müxbir və operator yüngül bədən xəsarətləri alıblar, çəkiliş kamerası isə əllərindən alınaraq sındırılıb. Əməkdaşlar kameranı geri tələb edərkən onları silahla hədələyiblər. Azərbaycan Televiziya və Radio Verilişləri QSC olaraq baş verənləri şiddətlə qınayır, baş vermiş hadisəni yalnız Azərbaycan jurnalistlərinə deyil, ümumilikdə söz və ifadə azadığına, azad jurnalistika fəaliyyətinə basqı hesab edirik. Biz Fransanın hüquq mühafizə orqanlarından bu hadisəni obyektiv araşdırmağı, jurnalistlərə silahlı hücum edən şəxslərin müəyyənləşdirilməsini və cəzalandırılmasını, dəymiş zərərin ödənilməsi üçün lazımi tədbirlər görməyi tələb edirik.
