Antiinhisar və İstehlak Bazarına Nəzarət Dövlət Xidməti kompüter və kompüter hissələrinin satışı ilə məşğul “Azerbaijan Technologies” Firmasında (“AzTech”) qanun pozuntusu aşkarlayıb.

İqtisadiyyat.az xəbər verir ki, buna görə də Dövlət Xidməti yanvarın 22-də şirkət barəsində İnzibati Xətalar Məcəlləsinin (İXM) 447.0.9-cu maddəsinə əsasən cərimə protokolu tərtib edib.

Cərimə protokolu “AzTech”in istehlakçının hüquqlarını məhdudlaşdıran şərtləri müqaviləyə daxil etdiyinə görə tərtib olunub.

Dövlət Xidmətinin məlumatına görə, “AzTech” tərəfindən zəmanət talonuna qanunvericiliklə nəzərdə tutulmuş hüquqlarla müqayisədə istehlakçıların hüquqlarını məhdudlaşdıran şərtlər daxil edilib.

“Azerbaijan Technologies” Firması “İstehlakçıların hüquqlarının müdafiəsi haqqında” Azərbaycan Respublikası Qanununun 7-ci və 16-cı maddələrinin tələblərini pozmaqda ittiham olunur.

Xatırladaq ki, İXM-in 447-ci maddəsi istehlakçıların hüquqlarının pozulması hallarını müəyyən edir. 447.0.9-cu maddədə isə deyilir ki, qanunvericilikdə nəzərdə tutulan hüquqlarla müqayisədə istehlakçının hüquqlarını məhdudlaşdıran şərtlərin müqaviləyə daxil edilməsinə görə vəzifəli şəxslər min beş yüz manatdan iki min manatadək məbləğdə, hüquqi şəxslər dörd min manatdan altı min manatadək məbləğdə cərimə edilir.

Qeyd edək ki, “AzTech” 1998-ci ildən Azərbaycanın İT bazarında fəaliyyət göstərir, ASUS, LENOVO və MSI brendlərinin rəsmi distributorudur. Şirkətin Bakıda kompüterlər və kompüter hissələrinin satışı həyata keçirilən rəsmi mağazası da var. Eyni zamanda Aztecshop.az saytı üzərindən məhsullar nümayiş olunur və internet satışlar həyata keçirlir.