Azərbaycan-Rusiya birgə müəssisəsi olan "AzRosPromİnvest" şirkətinə xarici valyuta vəsaitlərini xaricdən qaytarmamasına görə cərimə yazılıb.
İqtisadiyyat.az xəbər verir ki, Dövlət Gömrük Komitəsi tərəfindən şirkət barəsində İnzibati Xətalar Məcəlləsinin 483-cü maddəsinə əsasən cərimə protokolu tərtib edilib.
Daha sonra protokol baxılması üçün Qazax Rayon Məhkəməsinə göndərilib. İş hakim Nemət Musayevin sədrliyi ilə araşdırılacaq.
Şirkətin barəsində cərimə protokolu tərtib olunan maddədə deyilir ki, xarici iqtisadi fəaliyyətin həyata keçirilməsi nəticəsində əldə edilmiş və Azərbaycanın müvəkkil olunmuş banklarının hesablarına məcburi qaydada köçürülməli olan az miqdarda xarici valyuta vəsaitlərinin xaricdən qaytarılmamasına görə inzibati xətanın bilavasitə obyekti olan xarici valyutanın dəyərinin otuz faizindən əlli faizinədək məbləğdə cərimə edilir.
Burada “az miqdarda” dedikdə, iyirmi min manatadək olan məbləğ başa düşülür.
Qeyd edək ki, Azərbaycan-Rusiya birgə müəssisəsi "AzRosPromİnvest" 2006-cı ildə təsis edilib. "AzRosPromİnvest" MMC Azərbaycanda bentonit gili hasilatı və emalı ilə məşğuldur. Müəssisənin xammal bazası Qazax rayonu, Daş-salahlı kəndin yaxınlığında yerləşən unikal Daş-Salahlı bentonit gil yatağıdır.
