“Azərenerji” Açıq Səhmdar Cəmiyyətinin (ASC) nizamnamə kapitalı artırılıb.

İqtisadiyyat.az xəbər verir ki, Baş nazir Əli Əsədovun imzaladığı qərarla təsdiq edilmiş sənədlə Cəmiyyətin nizamnamə kapitalı 2 460 000 000 manata çatdırılıb.

Qeyd edilir ki, onun səhmlərinin nominal dəyərindən təşkil olunur və nominal dəyəri 20 manat olan 123 000 000 ədəd adi, sənədsiz adlı səhmdən ibarətdir.

Cəmiyyətin bütün səhmləri dövlətə məxsusdur. Cəmiyyətin nizamnamə kapitalı bu Nizamnaməyə uyğun olaraq təsisçi tərəfindən Cəmiyyətin mülkiyyətinə verilmiş və qanunla müəyyən edilmiş qaydada qiymətləndirilmiş aktivlərin balans dəyərindən təşkil olunur. Cəmiyyətin nizamnamə kapitalına qoyulan maya pul vəsaitləri, tam ödənilmiş qiymətli kağızlar, digər əmlak, o cümlədən əmlak hüquqları və pul dəyəri olan digər hüquqlardan ibarət ola bilər. Cəmiyyətin əmlakı əsas fondlardan, dövriyyə vəsaitlərindən, digər maddi və qeyri-maddi aktivlərdən ibarətdir. Cəmiyyətin əmlakının dəyəri onun balansında göstərilir.

Cəmiyyətin əmlakı aşağıdakı mənbələr hesabına formalaşır:
- nizamnamə kapitalına daxil olan əmlak;
- təsərrüfat fəaliyyətinin həyata keçirilməsindən əldə olunan gəlirlər;
- cəlb olunan investisiyalar;
- Cəmiyyətin öz fəaliyyət prosesində əldə etdiyi əmlak;
- qanunla qadağan olunmayan digər mənbələr.

Xatırladaq ki, hazırda “Azərenerji”nin nizamnamə kapitalı 1 760 494 580 manatdır.