Dekabrın 18-i Beynəlxalq Miqrantlar Günü kimi qeyd olunur. Bu tarix 18 dekabr 1990-cı ildən etibarən Bütün Miqrant İşçilərinin və onların Ailələrinin Hüquqlarının Müdafiəsi üzrə Beynəlxalq Konvensiyanın qəbul olunması ilə əlamətdardır.
Milli Məclisin deputatı Pərvanə Vəliyeva İqtisadiyyat.az-a açıqlamasında deyib ki, həssas miqrantlara deportasiya, müharibə və ya zorakılıq səbəbindən öz ölkələrini tərk etməyə məcbur olan qaçqınlar daxildir və bu insanlar beynəlxalq qanunla, xüsusilə də 1951-ci il Qaçqınlar Konvensiyası ilə qorunur:
“1991-ci ildə müasir Ermənistandan 300 mindən çox azərbaycanlının zorla qovulması başa çatdı. Azərbaycanlılara qarşı etnik təmizləmə, əksər hallarda, dövlət orqanlarının sistematik səyləri ilə zorakılıq, soyqırımı aktları, kütləvi qırğınlar və insanlığa qarşı digər cinayətlər, habelə insan hüquqlarının kobud şəkildə pozulması ilə həyata keçirildi. Bu proses 1905-1906, 1918-1921, 1948-1953 və 1987-1991-ci illərdə xüsusilə dəhşətli və amansız olmuşdur”.
Deputat vurğulayıb ki, qaçqınların öz evlərinə qayıdış hüququ beynəlxalq konvensiyalarda, o cümlədən 1951-ci il Qaçqınlar Konvensiyasında təsbit olunmuş əsas insan hüququdur.
Onun sözlərinə görə, hüquqi tanınmasına baxmayaraq, dünya üzrə milyonlarla qaçqın hələ də öz evlərinə qayıtmaqlarını əngəlləyən əhəmiyyətli maneə və çətinliklərlə qarşılaşırlar: “1948-ci ildə BMT-nin Baş Assambleyası 194 saylı qətnaməni qəbul edərək, qaçqınların evlərinə qayıtmaq və qonşularıyla əmin-amanlıq içində yaşamaq istədikləri təqdirdə, bunu mümkün olan ən qısa müddətdə etmələrinə icazə verilməsini qərara almışdır. Bu qətnamə ilə qaçqınların qayıdış hüququ təsbit olunur”.
P.Vəliyeva söyləyib ki, Qərbi Azərbaycan İcması Ermənistandan zorla deportasiya edilmiş 400 000-dən çox azərbaycanlı qaçqının əcdadlarının torpaqlarına qayıtmaq arzusu ətrafında birləşib: “Onların tələbi açıqdır: bu, ərazi iddiası deyil, bu, insan hüquqları məsələsidir. Tələbimiz zorla tərk edildiyimiz tarixi torpaqlara sülh şəraitində, təhlükəsizlik və ləyaqətli şəkildə qayıtmaqdır. 2030 Davamlı İnkişaf Məqsədləri (DİM) gündəliyi iki əsas ideala əsaslanır: universal insan hüquqlarının təminatı və “heç kəsi arxada qoymamaq” strategiyasının həyata keçirilməsi. DİM-lərin effektiv şəkildə reallaşması üçün qaçqınların, məcburi köçkünlərin və vətəndaşlığı olmayan insanların vəziyyətinin yaxşılaşdırılması və davamlı həllərin həyata keçirilməsi mütləqdir”.
