Azərbaycanlı tələbə ABŞ-ın nüfuzlu universitetlərindən biri olan Nyu-York Universitetinə tam təqaüdlə qəbul olunub.

İqtisadiyyat.az-ın məlumatına görə, Toğrul Ağbabalı universitetin maliyyə ixtisası üzrə 500 min dollar dəyərində tam təqaüd proqramını qazanmaqla doktoranturaya qəbul olunub.

Qeyd edək ki, T.Ağbabalı 2018-ci ildə Bakı şəhəri 43 saylı liseyi fərqlənmə diplomu ilə bitirib. O, həmin il İstanbul Texniki Universitetinin Nyu-York Universiteti ilə ortaq ikili bakalavriat programının Menecment fakültəsinə daxil olub. İstanbul Texniki Universitetindəki iki illik təhsil müddətini fakültə birincisi kimi bitirib. Maksimum təhsil təqaüdü əldə etməklə Nyu-York Universitetində təhsilini davam etdirib.

Daha sonra o, 2022-ci ildə Corc Vaşinqton Universitetinin Maliyyə üzrə magistr programına yüksək təqaüdlə daxil olub.

T.Ağbabalı Beynəlxalq Valyuta Fondu və Dünya Bankının 2022-ci il payız və 2023-cü il yazında Vaşinqtonda keçirilən iclaslarında iştirak etmək hüququ qazanan yeganə azərbaycanlı tələbə olub. Corc Vaşinqton Universiteti Azərbaycanlı tələblər birliyinin vitse-prezidentidir.

Magistr təhsilini maksimum bal toplayaraq bitirdiyinə görə "Charles and Florence Diehl" adına təsis olunan xüsusi sertifikata və pul mükafatına həmin il universitet üzrə layiq görülən yeganə məzun olub. Beynəlxalq biznes şərəf cəmiyyəti olan "Beta Gamma Sigma" cəmiyyətinə üzv seçilib.

Magistr təhsilini bitirdikdən sonra ABŞ-ın nüfuzlu universitetləri olan Nyu-York Universiteti, Alabama Universiteti və Florida Beynəlxalq Universitetlərindən tam təqaüdlə doktorantura təhsil almağa dəvət alıb. Hazırda təhsilini maliyyə üzrə doktorantura səviyyəsində Nyu-York Universitetində davam etdirir.