Xəbər verdiyimiz kimi Azərbaycanda müxtəlif dövlət qurumları Türkiyəyə yardım kampaniyasını davam etdirirlər. Bəs Milli Məclisin deputatları bu prosesdə necə iştirak edirlər?
İqtisadiyyat.az xəbər verir ki, bununla bağlı saytımıza açıqlama verəm Milli Məclisin deputatı Ceyhun Məmmədov artıq bu kampaniyalara qoşulduqlarını deyib:
"İlk gündən Azərbaycan bu məsələyə reaksiya verdi. FHN, Müdafiə Nazirliyi və Heydər Əliyev Fondu bu istiqamətdə addımlar atdı. Eyni zamanda vətəndaşlarımız da Türk xalqının yanında olduqlarını göstərirlər. Həmçinin biz deputatlar da bu prosesdə iştirak edirik, artıq aidiyyatı üzrə müvafiq yardımların edilməsinə başlamışıq. Həmin məbləğlər ən qısa vaxtda çatdırılacaq".
Deputat Fazil Mustafa bildirdi ki, bu çətin zamanda Türkiyəyə dəstək olmaq hər bir vətəndaşın borcudur və onlar da bu yardım kampaniyasında aktivlik göstərirlər:
"Hər bir vətəndaş onlarla həmrəy davranmağa borcludur. Biz də millət vəkilləri olaraq bu istiqamətdə maddi yardım göstərdik, demək olar ki bütün deputatlar bunu etdi. Həmçinin əşya və başqa yardımlar da etmişik, o da bu gün və sabah Türkiyəyə çatdırılacaq".
Milli Məclisin deputatı Naqif Həmzəyevin sözlərinə görə, 10-15 deputat bu yardım kampaniyasında iştirak edib:
"Məndə olan məlumata görə deputatlarımız müxtəlif kampaniyalara qoşularaq yardımlarını ediblər. Həmçinin fərdi olaraq da deputatlar yardım göndəriblər. Şəxsən özüm və bildiyim 10-15 deputat AFAD vasitəsi ilə yardım ediblər, ərzaq və geyim yardımında iştirak ediblər".
Cavidan Mirzəzadə / İqtisadiyyat.az
