Avropanın enerji damarlarını şaxələndirmək Azərbaycanın imzası ilə reallaşır. Avropa İttifaqı ilə imzalanan qaz anlaşması daha da genişlənir.

Həmin anlaşma əvvəllər Azərbaycandan Avropaya qaz ixracının həcminin artırılmasını nəzərdə tuturdusa artıq nəqlin şaxələndirilməsi işləri aparılır. Yəni qaz həcmi artdiqca, şaxələndirmə da genişlənir.

Avropa İttifaqına təbii qazın təchiz edilməsinin yeni marşrutunun formalaşması isə o deməkdir ki,  Bolqarıstan, Rumıniya, Macarıstan, Slovakiya Azərbaycan qazının Avropaya çatdırılmasında sistem qurur. İqtisadiyyat.az xəbər verir ki, bu vaxtilə qurulan enerji strategiyasının mərhələli və uğurlu şəkildə reallaşmasıdır.

Məsələn Azərbaycanın adı enerji sahəsində əvvəllər Bakı-Tiflis-Ceyhanla hallanırdısa artıq buna Cənub Qaz Dəhlizi kimi nəhəng bir ad da qoşulur. 2 ildən də artıq müddət ərzində avropalı tərəfdaşları Azərbaycandan etibarlı və sabit şəkildə qaz ala bilirlərsə deməli layihə özünü doğruldur. Doğru yolda irəliləyərək təchizatın şaxələndirilməsi baxımından Sofiyada imzalanan müqavilə  böyük işin davamıdır. Qaz borularının uzunluğu artdıqca Azərbaycanın da Avropa üçün önəmi artır. Bu müasir dövrdə olduqca vacibdir. Çünki Avropa İttifaqı iqtisadi gücünə görə ABŞ-dan sonra dünyada ikincidir. Belə bir güclü qurumla enerji əməkdaşlığı Azərbaycanı da gücləndirir. Avropa İttifaqi ölkələri qışda Azərbaycan sayəsində enerji təhlükəsizliyinj təmin edə biliblərsə, deməli məntiqli olaraq bu əmakdasliq genişləndirilməlidir və edilir. Elə ona görədir ki, Bolqarıstanın energetika naziri B. Hristov region ölkələri ilə "Həmrəylik halqası"nı genişləndirilməsi işinin aparıldığını bildirdi. Aİ komissarı K. Simson da bu təşəbbüsləri dəstəkləyəcəklərini dedi. Macarıstanın energetika naziri P. Soyartonun qaz idxalı və onun şaxələndirilməsi işində Azərbaycana güvəndiklərini söyləməsi, Rumıniyanın energetika naziri V.D.Popeskunun layihəyə dəstək verəcəklərini deməsi, Slovakiyanın iqtisadiyyat naziri K. Hirmanın "mən qaz və neft mühəndisiyəm, Azərbaycanın tərəfdaş kimi necə etibarlı olduğunu və olacağını bilirəm" deməsi Azərbaycan imzasının hər bir sahədə həmrəyliyə səbəb olduğunu göstərir.

"Həmrəylik halqası" da bu qəbildəndir.

 

Samir Cabbarov - İqtisadiyyat.az