Azərbaycanda 2023-cü ilin “ Heydər Əliyev İli” elan edilməsi ilə bağlı “Tədbirlər Planına” uyğun olaraq, Qazaxıstanın Aktöbe Xalq Dostluq evində dəyirmi masa təşkil olunub.

Tədbirdə Aktöbe Dostluq evinin sədri, Aktöbe vilayətinin Sənaye və innovasiya inkişaf idarəsinin rəhbəri xanım Korqanbayeva Mərcan, Azərbaycanlı və digər millətlərin icma rəhbərləri və nümayəndələri iştirak edib.

Həmçinin Qazaxıstanın "Qazaqstan" telekanalının ərsəyə gətirdiyi Ulu öndər Heydər Əliyevin xatirəsinə həsr olunmuş film nümayiş olunub.

Azərbaycanın Qazaxıstandakı konsulluğundan İqtisadiyyat.az-a verilən məlumata görə, film müasir Azərbaycanın memarı, görkəmli dövlət xadimi, Azərbaycanın ümummilli lideri Heydər Əliyevin 100 illik yubileyinə həsr olunmuş layihə çərçivəsində hazırlanıb.

Qeyd edək ki, film Qazaxıstanın və Azərbaycanın siyasətçilərinin, dövlət və ictimai xadimlərinin Heydər Əliyevlə bağlı xatirələrini əks etdirir. Çəkilişlər Astana, Aktau və Bakıda aparılıb.