Dövlət Statistika Komitəsi ölkənin avtomobil parkındakı vəziyyətlə bağlı ən son məlumatları açıqlayıb.
İqtisadiyyat.az xəbər verir ki, 2022-ci ildə Azərbaycanda qeydiyyatda olan 1.4 milyon ədəd minik avtomobilinin 45%-i (634 mindən çoxu, təxminən hər 2 avtomobildən biri) yaşı 20 il və daha çoxdur. Yaşı 10-20 il olan avtomobillərin sayı 545 mindir, bu, minik avtomobillərinin ümumi sayının 38.4%-ni təşkil edir. Ümumi avtomobillərin cəmi 17%-inin yaşı 10 ilə qədərdir.
Əvvəlki illərlə müqayisədə Azərbaycanda "qoca" maşınların sayı artıb. Belə ki, 2019-cu ildə Azərbaycanda yaşı 10 ildən çox olan avtomobillər 78% təşkil edirdisə, 2021-ci ildə bu rəqəm 80%, ötən il isə 83% olub.
2022-ci ildə minik avtomobillərinin yaşı aşağıdakı kimi olub:
5 ilə qədər |
71.366 |
5 ildən 10 ilə qədər |
168.792 |
10 ildən 20 ilədək |
545.265 |
20 il və yuxarı |
634.447 |
Ümumi sayı |
1.419.870 |
Ölkənin avtobus parkında isə vəziyyət daha pisdir. Belə ki, ölkədə olan 31 mindən çox avtobusun 63%-dən çoxunun yaşı 20 il və daha çoxdur. Avtobusların sadəcə 12%-ə yaxınının yaşı 10 ilə qədərdir.