Azərbaycanın İrandakı səfirliyinə silahlı hücum digər ölkələri də xeyli düşündürür. Qonşu ölkənin səfirliyinə qarşı bu cür basqın olduğu halda, digər ölkələrin də narahatlığı gözləniləndir.

Siyasi şərhçi Elxan Şahinoğlu İqtisadiyyat.az-a açıqlamasında bildirib ki, bu narahatlıqlar anlaşılandır və digər ölkələr tərəfindən də bununla bağlı müəyyən addımlar atıla bilər:

“İran nadir ölkələrdən biridir ki, hər zaman ordakı səfirliklərdə belə ciddi problemlər yaranıb. Məsələn, 200 il bundan əvvəl İranda Rusiya səfirini öldürmüşdülər. 1979-cu ildə Amerika səfirliyinə hücum edilmişdi. Bu kimi hadisələrə görə, mümkündür ki, bir sıra ölkələrin, əsasən də qərb ölkələrinin səfirlikləri ya səlayihətlərini məhdudlaşdırsınlar, ya da fəaliyyətlərini tamamilə dayandırsınlar.”

Ekspert deyir ki, bu narahatlıq təkcə Azərbaycanla əlaqəli deyil. Səfirliyə edilən terrordan sonra İsrailin  PUA-ları Təbrizdəki dron zavodu, İsfahanda hərbi müəssisə və Mallarddakı sursat anbarına zərbələri müharibə ehtimalını daha da gücləndirir. Bir gecədə İranın ən strateji obyektlərini darmadağın etməklə İsrail İrana “göz dağı” vermiş oldu:

“Bu hadisələrin fonunda hesab edirəm ki, əksər qərb dövlətləri Tehrandakı diplomatik fəaliyyətlərini dayandıracaqlar. İlk olaraq isə bu addımı Böyük Britaniya ata bilər. Çünki Böyük Britaniya Amerikanın müttəfiqidir. İsraillə yaxşı əlaqələri var. İsrail hücum etdikdən sonra İran da İsrailin tərəfdaşlarını hədəfə ala bilər. Bu nöqtəyi nəzərdən ilk səfirlik fəaliyətini donduran ölkə böyük ehtimalla Böyük Britaniya olacaq.”