Bu barədə İqtisadiyyat.az “AzərEnerji”dən məlumat əldə edib.
Məlumata görə, qurum bununla bağlı elan etdiyi satınalma müsabiqəsini yekunlaşdırıb və BESS-lərin quraşdırılması işlərini icra edəcək şirkət müəyyənləşib.
Tenderin nəticələrinə əsasən, BESS-ləri Türkiyənin “Yeo Elektrik Otomasyon” Anonim Şirkətinin Azərbaycandakı Filialı quraşdıracaq.
“AzərEnerji” bu nəhəng layihənin reallaşdırılması ilə bağlı sözügedən şirkətlə 154 milyon manat dəyərində müqavilə bağlayıb.
Qeyd edək ki, Energetika Nazirliyinin qiymətləndirmələrinə görə, 2 GVt həcmində “yaşıl enerji”nin inteqrasiyası üçün Azərbaycana 250 MVt gücündə saxlanc sistemi lazımdır.
Layihənin 2027-ci ilə qədər həyata keçirilməsi, ilkin mərhələdə 50 MVt gücündə saxlanc sisteminin yaradılması nəzərdə tutulur.
Ötən il may ayının əvvəlində Energetika Nazirliyi ilə Səudiyyə Ərəbistanının “ACWA Power” şirkəti arasında 200 MVt gücündə Batareya Enerji Saxlanc Sistemi layihəsi üzrə icra müqaviləsi imzalanıb.
Məlumat üçün bildirək ki, BESS-lər bərpa olunan enerji mənbələrindən əldə edilən elektrik enerjisinin saxlanılması üçün istifadə olunur.
