Azərbaycanda pomidor ixracatçısı olan "Gözəl təbiət" şirkəti cərimələnə bilər.

İqtisadiyyat.az xəbər verir ki, şirkət gömrük rəsmiləşdirilməsi qaydaları ilə bağlı qanunvericiliyin tələblərini pozmaqda ittiham olunur.

Belə ki, Dövlət Gömrük Komitəsi şirkət barəsində İnzibati Xətalar Məcəlləsinin 490-cı maddəsinə əsasən cərimə protokolu tərtib edib.

Daha sonra protokol baxılması üçün Nizami Rayon Məhkəməsinə göndərilib.

İş hakim Nəriman Mehdiyevin sədrliyi ilə araşdırılacaq.

Qeyd edək ki, İXM-nin 490-cı maddəsində gömrük rəsmiləşdirilməsi qaydasının pozulmasına görə cərimə nəzərdə tutulur. Gömrük rəsmiləşdirilməsi qaydasının pozulmasına, yəni gömrük rəsmiləşdirilməsinin başlanması və başa çatması, onun keçirilmə yeri, vaxtı və üsulu barədə müəyyən olunmuş tələblərə riayət edilməməsinə və ya gömrük rəsmiləşdirilməsinin sadələşdirilmiş qaydasının tətbiqi şərtlərinə əməl edilməməsinə görə fiziki şəxslərə xəbərdarlıq edilir və ya onlar iyirmi manatdan əlli manatadək məbləğdə cərimə edilir, vəzifəli şəxslərə xəbərdarlıq edilir və ya onlar yetmiş beş manatdan yüz əlli manatadək məbləğdə cərimə edilir, hüquqi şəxslər iki yüz əlli manatdan beş yüz manatadək məbləğdə cərimə edilir.

Xatırladaq ki, “Gözəl Təbiət” MMC Azərbaycanda pomidor istehsalı və ixracı ilə məşğuldur. Şirkətin “Green Tech” adlı istixanaları mövcuddur.