Azərbaycanda minimum əməkhaqqlarının artırılması həm də vətəndaşlarımızın gələcəkdə pensiyasına müsbət təsir göstərəck.

Bu sözləri İqtisadiyyat.az-a açıqlamasında Milli Məclisin Əmək və sosial siyasət komitəsinin sədri Musa Quliyev deyib.

O xatırladıb ki, Prezident İlham Əliyevin sərəncamları ilə ölkədə 5-ci dərin sosial islahatlar zərfi qəbul olunub və 2025-ci il yanvarın 1-dən minimum əməkhaqqının məbləği 55 manat artaraq 400 manata çatdırılıb:

“Eyni zamanda fevralın 1-dən pensiyaların minimum məbləği 280 manatdan 320 manata qaldırılacaq. Cənab Prezidentin tapşırığı ilə hökumət Prezident təqaüdlərinin və bəzi müavinətlərin artırılmasına dair təkliflər hazırlayır. Minimum əmək haqqının artırılması ölkədə vahid tarif cədvəli üzrə əməkhaqqı alan təxminən 700 min vətəndaşımızın əmək haqqının artmasına səbəb olacaq. Bunlardan təqribən yarısı dövlət büdəsindən maliyyələşən təşkilatlarda çalışanlardır, yarısı isə özəl sektorda çalışan şəxslərdir. Yəni təkcə minimum əməkhaqqı alanlar deyil, digər kateqoriyadan olan vahid tarif cədvəli üzrə əməkhaqqı alan hər kəsin əmək haqqı artmış olacaq”.

M.Quliyevin sözlərinə görə, bütövlükdə, həm əməkhaqqının, həm də pensiyaların artımı 3 milyon vətəndaşımızın sosial rifah halını yaxşılaşdırmış olacaq: “Onu da qeyd edim ki, bu sərəncamlarla əməkhaqqları təxminən 16,3 faiz, minimum pensiya isə 14 faiz artmış olacaq. Minimum əməkhaqqlarının artması həm də vətəndaşlarımızın pensiyasına müsbət təsir göstərəck, onların pensiya katitalı da artacaq”.

Komitə sədri həmçinin bildirib ki, icbari sosial sığorta haqqlarının məbləği artacaq, bununla yanaşı tibbi sığorta haqlarının məbləği artacaq və tibbi sığortanın imkanları daha da genişlənəcək: “Bir məsələni də vurğulamaq lazımdır ki, həm əməkhaqqının, həm də pensiyanın minimum məbləğinin artımı bu il gözlənilən inflyasiyanı təxminən 3 dəfə üstələyir. Bu il gözlənilən inflyasiya təxminən 5 faiz həddində olacaq, əməkhaqqı artımı isə 16 faizdən çoxdur. Bunlar göstərir ki, Azərbaycan vətəndaşlarının sosial rifah halı daha etibarlı şəkildə təmin ediləcək”.