Milli Məclisin deputatı Tahir Kərimli Azərbaycanda kredit faizlərinin yüksək olmasından şikayətlənib.
Deputat İqtisadiyyat.az-a açıqlamasında bankların təklif etdiyi kredit faizlərinin kifayət qədər yüksək olduğunu söyləyib.
Parlamentin plenar iclaslarında dəfələrlə bank faizlərinin çox olmasından şikayətləndiyini xatırladan deputat deyib ki, əhalisinin böyük əksəriyyəti müsəlman olan Azərbaycanda faiz qadağan olunmalıdır: "Avropa dövlətlərində, digər İslam ölkələrində faiz dərəcələri heç vaxt ikirəqəmli olmur: bir, iki, üç və beş faiz olur. Amma bizdə faiz dərəcələri 20-30% aralığındadır. Əlbəttə, bunun bir səbəbini onunla izah edirlər ki, dövlət bankının uçot dərəcələri yüksəkdir və bu, onların ödənməsini təmin etməkdən ötrüdür. Amma bu məsələ vətəndaşı az maraqlandırır. Şəxsən bankın uçot dərəcəsinin nə qədər olması məni o qədər də maraqlandırmır. Vətəndaşa və dövlətimizə lazımdır ki, camaatın ödəyə bilməsi üçün kreditlər aşağı faizli olsun".
Azərbaycanda faizlər dünyanın əksər ölkələri ilə müqayisədə çox yüksəkdir
T.Kərimli Azərbaycandakı bank kreditlərini digər ölkələrlə müqayisə edib. O deyib ki, bir sıra dövlətlərdə, o cümlədən Belarusiyada yeni ailə quran cütlüyə kredit verilir: "Əgər onun uşağı olursa, 25% krediti silinir. Ərəb dövlətlərində ailən quran adama 120 min dollar kredit verirlər. Onlarda 3-cü uşaq olandan sonra isə kredit tamamən silinir. Bizdə isə kredit faizlərinin yüksək olması millətin belini qırır, insanlar ödəyə bilmirlər. Adamlar dolanışığını təmin etmək, doyunca ərzaq yemək, digər zəruri tələbatlarını ödəmək əvəzinə, aldıqları maaşın, əməkhaqqının, pensiyanın çox böyük hissəsini faiz ödəyirlər. Bu da normal deyil. Azərbaycanda faizlər dünyanın əksər ölkələrindən çox yüksəkdir. Bəlkə də, ön sıralarda gedir".
Deputat vurğulayıb ki, kredit faizlərinin yüksək olmasının səbəbi maliyyə oliqarxları ilə bağlıdır və bu, onların qurduqları işlərdir: "Ona görə də düşünürəm ki, bu məsələ sistemli həll olunmalıdır. Hesab edirəm ki, dövlət iradəsi özünü göstərməli və banklara təsir edilməlidir. Uçot dərəcələri hədsiz aşağı salınmalıdır ki, banklar oradan pul götürüb əhaliyə - fiziki və hüquqi şəxslərə yüksək faizlə verməsin. Bir sözlə, bu sahədə dövlət intizamı lazımdır. Yoxsa bu məsələ düzələn deyil və xalq bunun əzabını çəkəcək".
Sadiq Cavadov
