İqtisadiyyat.az xəbər verir ki, bunu Milli Məclisdə 2025-ci ilin dövlət büdcəsinin müzakirəsi zamanı deputat Bəxtiyar Əliyev deyib.
Deputat bildirib ki, bu uğurun əldə edilməsi birmənalı olaraq Azərbaycan Respublikasının Prezidenti cənab İlham Əliyevin nüfuzunun, həyata keçirdiyi uğurlu xarici siyasətinin, tərəfdar ölkələrlə aparılan intensiv danışıqların nəticəsidir:
“Azərbaycanda karbon emissiyasının azaldılması və bərpa olunan enerji sektorunun inkişafı istiqamətində ardıcıl və məqsədyönlü iş aparılır. Təkcə onu qeyd edim ki, Ermənistanın 30 illik işğalından sonra azad edilmiş Qarabağ və Şərqi Zəngəzurun yenidən bərpası və Azərbaycan iqtisadiyyatına inteqrasiyası bütövlükdə iqtisadiyyatın böyüməsinə, yeni iş yerlərinin açılmasına, alternativ enerji mənbələrinin istifadəsinə əhəmiyyətli dərəcədə təsir etmişdir. Bunun ilkin nəticələrini artıq müşahidə edirik”.
"Yeni su elektrik stansiyalarının, külək və günəş elektrik stansiyalarının istifadəyə verilməsi enerji sektorunun, xüsusilə “yaşıl enerji” istehsalının inkişafını təmin etmişdir. Belə ki, Laçında, Kəlbəcərdə və Suqovuşanda bərpa edilən 20.2 Mvt gücündə 4 su elektrik stansiyası istifadəyə verilmişdir. Zəngilan/Cəbrayıl zonasında 240 Mvt gücündə günəş elektrik stansiyasının tikilməsi, Laçın/Kəlbəcər zonasında 100 Mvt gücündə külək elektrik stansiyası, Araz çayı üzərində 140 Mvt iki su elektrik stansiyasının tikintisi COP29 tədbirinin Azərbaycan tərəfindən uğurla və tarixi nəticə ilə başa çatdıracağının real zəmini idi. Bəzi Qərb dövlətlərinin siyasi dairələri ölkəmizə və onun uğurlarına, beynəlxalq aləmdə nüfuzun artmasına qısqanclıqla yanaşaraq, Azərbaycana, beynəlxalq əməkdaşlığın inkişafına və COP29-da uğur əldə edilməsinə zərbə vurmaq üçün təsir dairələrində olan siyasətçilər, media və QHT-lər vasitəsilə misli görünməmiş qarayaxma kampaniyası apardılar. Amma onların bu çirkin və siyasi əxlaqa sığmayan fəaliyyəti uğursuz oldu. Bütün dünya bir daha şahidi oldu ki, Azərbaycan qarşısına qoduğu məqsədlərə nail olur və heç bir qara qüvvə ona maneə ola bilməz”, - deputat əlavə edib.
