Prezident İlham Əliyevin imzaladığı sərəncamla bu ildən Azərbaycanda yeni sosial paket icra olunur. Belə ki, yanvarın 1-dən ölkəmizdə minimum aylıq əməkhaqqının məbləği 345 manatdan 16 faiz artımla 400 manata çatdırılıb, fevralın 1-dən isə əmək pensiyasının minimum məbləği 280 manatdan 14,3 faiz artımla 320 manata çatdırılacaq. Bu, dövlət başçısının siyasətinin mərkəzində vətəndaş rifahının təminatı prinsipinin dayandığını və bu məqsədlə aparılan sosial islahatların uğurla davam etdirildiyini bir daha göstərir. Bu artımlarla birgə artıq 2018-ci ilin əvvəlindən minimum aylıq əməkhaqqında 3,1 dəfə, minimum pensiyada 3 dəfəyədək artıma nail olunub. Yeni sosial islahat paketində digər sosial ödənişlərin artırılması da yer alıb. 2018-2024-cü illərdə müavinət və təqaüd ödənişlərində 5 dəfə artım baş verib və göründüyü kimi, bu artım dinamikası bu il də davam edəcək.
Milli Məclisin deputatı Vasif Qafarov İqtisadiyyat.az-a açıqlamasında sosial sahədə həyata keçirilən müsbət dəyişikliklərdən danışıb.
O xatırladıb ki, bu il yanvarın birindən minimum əməkhaqqı 55 manat artıb və 400 manata çatıb: "Fevralın birindən isə minimum pensiya 40 manat artır və 320 manata çatır. Orta hesabla artım 14-15 faiz arasında olur. Artımların xüsusilə az müdafiə olunan təbəqəyə yönəlməsi, dövlətin sosial ədalət prinsiplərinə əsaslanan siyasətinin bir hissəsidir. Azərbaycan hökuməti həmçinin Qarabağın bərpası kimi böyük investisiyaların həyata keçirildiyi bir dövrdə sosial məsələləri də diqqət mərkəzində saxlayır. Son bir neçə ildə dörd sosial paket həyata keçirilib və bu məqsədlərə 7 milyard manatdan çox vəsait xərclənib".
Deputatın sözlərinə görə, bu yanaşma Azərbaycanın iqtisadi inkişafı ilə paralel olaraq ölkədə sosial inkişafı da nəzərdə tutan bir siyasətin həyata keçirildiyini göstərir: "Gələcəkdə də iqtisadi imkanlar artdıqca, sosial məsələlərin həlli, minimum əməkhaqqı, pensiya, sosial müavinətlərin artırılması məsələləri ön planda saxlanılacaq. Cənab Prezidentin qeyd etdiyi kimi, Azərbaycan vətəndaşları ildən-ilə daha yaxşı yaşamalıdır və yaşayacaq".
V.Qafarov xatırladıb ki, Prezident İlham Əliyevin yanvarın 7-də yerli televiziya kanallarına verdiyi müsahibədə Azərbaycanın 2024-cü ildə siyasi, iqtisadi, sosial və digər sahələrdə əldə etdiyi uğurlar barədə geniş məlumat verilib:
"Azərbaycanın 2024-cü ildə iqtisadi sahədə qazandığı uğurlar göz qabağındadır. Keçən il Azərbaycanda ümumi daxili məhsul 4 faizdən çox artıb və bu artımın əsas səbəbi qeyri-neft sektorunun inkişafıdır. Qeyri-neft sektoru 6 faizdən çox artıb, xüsusilə sənaye istehsalında 7 faizdən çox artım müşahidə olunub. Bu göstəricilər Azərbaycanın iqtisadi inkişafını göstərir. İqtisadi islahatlar, şəffaflıq, inhisarçılığa qarşı mübarizə və investisiyaların cəlb edilməsi kimi tədbirlər nəticəsində ölkə beynəlxalq reytinq agentliklərindən müsbət rəylər alıb. 2024-cü ildə Azərbaycan maliyyə vəziyyətini əhəmiyyətli dərəcədə yaxşılaşdırıb və valyuta ehtiyatlarını artırıb. İl ərzində valyuta ehtiyatları 5 milyard dollardan çox artaraq 72 milyard dollara çatıb".
"Beş il əvvəl Azərbaycanın xarici borcu ümumi daxili məhsulun təqribən 20 faizini təşkil edirdi və o zaman hədəf olaraq bu nisbəti 10 faizə endirmək məqsədi qoyulmuşdu. Bu gün isə xarici borc ümumi daxili məhsulun yalnız 7.2 faizini təşkil edir. Azərbaycan iqtisadiyyatının güclü və dayanıqlı olması, xarici maliyyələşmə ehtiyacını azaldır və ölkəyə daha çox sərbəst maliyyə resursları qazandırır, gələcəkdə iqtisadi inkişafı dəstəkləmək və sosial layihələrə investisiya qoymaq üçün daha geniş imkanlar yaradır", - deputat əlavə edib.
Milli Məclisin üzvü söyləyib ki, Azərbaycan 2025-ci ilin büdcəsi ilə tarixində ən böyük büdcəni təqdim edib: "Bu ilin büdcəsi 41 milyard manatdan çoxdur, icmal büdcə isə 48 milyard manatı aşır. Büdcənin bu səviyyəyə çatması, Azərbaycanın daxili resurslarına əsaslanaraq, şəffaflıq, düzgün idarəetmə və iqtisadi siyasətin müsbət nəticəsi olaraq əldə edilib. Büdcə parametrləri və dinamika ölkə iqtisadiyyatının sağlam və davamlı inkişafını göstərir. Böyük büdcə ilə Azərbaycan sosial və iqtisadi layihələrin maliyyələşdirilməsi, infrastrukturun inkişafı və digər mühüm dövlət layihələrini həyata keçirmək üçün ciddi resurslara malikdir".