Cari ilin yanvar-oktyabr aylarında tikinti materiallarının istehsalı 19,6 faiz azalıb. Həmçinin bu ilin yanvar-oktyabr aylarında ölkədə 103495,8 milyon manatlıq və ya əvvəlki ilin eyni dövrü ilə müqayisədə 4,9 faiz çox ümumi daxili məhsul istehsal olunub. ÜDM istehsalının 6,3 faizi tikinti sahəsinin payına düşüb. Tikinti materiallarının istehsalı sahəsində bu dövr ərzində istehsalın ümumi dəyəri 1172,6 milyon manat olmaqla, əvvəlki ilin müvafiq dövrü ilə müqayisədə 19,6 faiz artıb. Dövr ərzində sementdən, betondan kərpiclər və oxşar məmulatların istehsalı 52,8 faiz, beton istehsalı 31,6 faiz, betondan yığma tikinti konstruksiyalarının istehsalı 24,4 faiz, sement istehsalı 11,2 faiz, asfalt istehsalı isə 10,6 faiz artıb. 

Rəsmi statistik məlumata görə, Azərbaycanda fərdi yaşayış evlərinin tikintisi də ötən illə müqayisədə 14 faiz azalıb. Bu müddətdə əsas kapitala 14391,1 milyon manat məbləğində, yaxud əvvəlki ilin müvafiq dövrü ilə müqayisədə 4,4 faiz az investisiya yönəldilib. İstifadə olunmuş investisiyanın 1920,1 milyon manatı (13,3 faizi) isə yaşayış evlərinin tikintisinə sərf olunub. Yaşayış evlərinin tikintisinə yönəldilmiş investisiyalar çoxmənzilli binaların, fərdi yaşayış və bağ evlərinin tikintisinə yönəldilmiş investisiyalardır. 

Bəs fərdi yaşayış evlərinin tikintisi niyə azalıb?

Əmlak məsələləri üzrə ekspert Ramil Osmanlı İqtisadiyyat.az-a açıqlamasında deyib ki, bu azalma müxtəlif amillərlə bağlıdır.

Onun sözlərinə görə, əsas səbəblərdən biri də odur ki, insanlar artıq qanunsuz evlərin tikintisinə maraqlı deyil. Ekspert bildirib ki, ötən ilin müvafiq dövrü ilə müqayisədə 14 faiz azalma kifayət qədər böyük rəqəmdir:

“Bir tərəfdən qanunsuz evlərin sənədləşməsi ilə bağlı müzakirələr uzandıqca, insanların sənədsiz fərdi yaşayış evlərini sənədləşdirəcəyinə ümidi azalır. Digər tərəfdən sənədsiz evlərin kommunal infrastruktura qoşulması ilə bağlı dövlət tərəfindən qəbul edilən yeni qaydalar və qanunsuz tikililərlə mübarizə məqsədi ilə bağlı qəbul edilən digər qərarlar nəticədə insanların qanunsuz ərazilərdə ev tikməyə marağını azaldıb. Yəni əgər əvvəlki dövrdə insanlar qanunsuz ərazilərdə ev tikirdilərsə, artıq bundan uzaq durmağa çalışırlar. Əlbəttə ki, bu da ümumilikdə fərdi yaşayış evlərinin tikintisində azalmaya səbəb olub”.

Qeyd edək ki, bir müddət əvvəl hökumətin verdiyi qərara görə ölkədə müvafiq sənədi (çıxarışı) olmayan evlərə - tikilərsə belə, kommunal xətlərin verilişi dayandırılıb.