“Hazırda Azərbaycanda avtomobil bazarında durğunluq mövcuddur.

Bunu İqtisadiyyat.az-a açıqlamasında nəqliyyat məsələləri üzrə ekspert Eldəniz Cəfərov deyib.

Onun sözlərinə görə, avtomobil bazarında fəaliyyətin azaldığı müşahidə olunur: “Həm yeni, həm də köhnə avtomobillərin alqı-satqısı davam edir. Avtomobillərə tələbat həmişə var, çünki iqtisadiyyat böyüdükcə, şəhərlərdə əhali sayı artdıqca, nəqliyyat vaitələrinə də ehtiyac artır”.

Ekspert bildirib ki, hazırda avtonəqliyyat sahəsi özü də şaxələnib: “Əvvəllər dizel və benzin mühərrikli avtomobillər alınıb-satılırdısa, hazırda hibrid və elektromobillər də var və vətəndaşlarımız bu avtomobillərdən də istifadə edirlər. Hazırda yenə də ən çox tələbat benzin mühərrikli avtomobillərədir. Daha sonra hibrid avtomobillər populyardır. 3-cü yerdə dizel mühərrikli avtomobillərdir. Sonuncu yerdə isə elektromobillər dayanır”.

E.Cəfərov söyləyib ki, vətəndaşların hazırda daha çox müraciət etdiyi avtomobillər mühərrik həcmi 1500-2000 kubsantimetrə qədər olan avtomobillərdir: “Bunlar ikinci əl bazarında daha çox tələbat olan avtomobillərdir. Birinci əl avtomobil bazarında hibrid avtomobilləri qeyd edə bilərik. Mühərrik həcmi 2000-2500 kub santimetr olan hibrid olan avtomobillər daha populyardır. Qiymətlərə gəlincə isə, bu, sabitdir. Kəskin qiymət dəyişikliyi yoxdur və düşünürəm ki, Novruz tətilinə qədər bazarda qiymət dəyişməz olaraq qalacaq”.