Qurumdan İqtisadiyyat.az-ın sorğusuna cavab olaraq bildirilib ki, ötən ilin dekabr ayının 23-ü Prezident İlham Əliyev tərəfindən “Əhalinin sosial rifahının yaxşılaşdırılması sahəsində tədbirlərin davam etdirilməsi haqqında” Sərəncam imzalanıb.
Sərəncamın icrasına 2025-ci ilin yanvar ayının 1-dən başlanılıb. Belə ki, 2025-ci il yanvarın 1-dən ölkəmizdə minimum aylıq əməkhaqqının məbləği 345 manatdan 16 faiz artımla 400 manata çatdırılıb:
“İlkin olaraq bildirək ki, “Əmək və məşğulluq” altsistemində olan elektron müqavilələrə işəgötürənlər tərəfindən əsas iş yeri və tam iş vaxtı rejimi üzrə minimun əməkhaqqı məbləğindən aşağı əməkhaqqı daxil edilməsi ilə bağlı məhdudiyyət tətbiq edilib. Qeyd edək ki, dekabr ayının 24-dən etibarən Dövlət Əmək Müfəttişliyi Xidməti minimum əməkhaqqından aşağı əməkhaqqı qeyd edilən əmək müqavilələrinə qanunvericiliyin tələblərinə uyğun olaraq dəyişiklik edilməsi ilə bağlı “Əmək və Məşğulluq” altsistemi üzərindən işəgötürənlərə bildiriş göndərib, maarifləndirmə işləri aparılır”.
Məlumatda qeyd olunub ki, minimum əməkhaqqı məbləğinin artımından sonra əmək müqaviləsində əməkhaqqı məbləğinə həmin artıma uyğun olaraq dəyişiklik etməyən işəgötürənlər elektron informasiya sistemi ilə müəyyən edilərək ilkin olaraq müxtəlif vasitələrlə (SMS xəbərdarlıq, telefon zəngləri, ƏMAS bildirişləri, sosial şəbəkələrdə paylaşımlar və s.) aşkar edilmiş kənarlaşmaların aradan qaldırılması istiqamətində məlumatlandırma işləri aparılır.
“Əmək müqavilələrində dəyişiklik etməyən işəgötürənlərə məktublar göndəriləcək, pozuntu aradan qaldırılmadığı təqdirdə İnzibati Xətalar Məcəlləsinin 192.3-cü maddəsinə əsasən işçiyə minimum aylıq əməkhaqqından aşağı məbləğdə əməkhaqqı verilməsi ilə bağlı olaraq inzibati məsuliyyət tədbiri tətbiq olunacaq”, - Dövlət Əmək Müfəttişliyi Xidmətindən vurğulanıb.