Dünyada gedən iqtisadi və geosiyası proseslər, inflyasiyanın hələ də davam etməsi sosial proseslər istiqamətində də əlavə vəsait ayrılmasını vacib edir.
İqtisadiyyat.az xəbər verir ki, bunu deputat Əli Məsimli Milli Məclisin bu gün keçirilən növbədənkənar iclasında deyib.
O qeyd edib ki, bu baxımdan bir tərəfdən iqtisadi artım templərini artırmaqla digər tərəfdən ÜDM-in indi olduğu kimi 30-32 %-ni yox, 40 %-ə qədərinin büdcə vasitəsilə şəffaflıq kontekstində artırılması həm azad edilən ərazilərimizə yetərincə vəsaitin yönəldilməsi, həm də sosial problemlərin həlli üçün yetərincə vəsaitin olmasına gətirər:
"Gələcəyə yatırım baxımından təhsilə ayrılan vəsaitə də yenidən baxılmalıdır. Çünki təhsilə ayrılan vəsaitin 80 %-i əməyin ödənişinə yönəldilir. Regional problemlərin həllinə də yenidən baxılsa, yaxşı olar. Regionlarda kanalizasiya sistemi, kəndlərin qazlaşdırılması prosesi bitməlidir. Digər tərəfdən Qarabağ müharibəsi veteranlarına verilən 80 manat müavinət də artırılsa yaxşı olar".
Ə.Məsimli onu da vurğulayıb ki, bu il dövlət büdcəsindən işğaldan azad edilən ərazilərimizdə bərpa və yenidənqurma işlərinin sürətlədirilməsi üçün 2 milyard 260 milyon manat vəsaitin ayrılması nəzərdə tutulur:
"Bütövlükdə daha əvvəl ayrılan vəsaiti də nəzərə almaqla bu bölgəyə 5 milyard 260 milyon manat vəsait ayrılacaq. Bu, Böyük Qayıdış prosesi üçün maliyyə təminatında mühüm rol oyanayacaq. Azərbacyan 44 günük vətən müharibəsindən təkcə qalib dövlət kimi yox, həm də böyük hədəflərə çatmaq üçün güclü dövlət kimi çıxıb. Bu iki istiqamətin Azərbaycanın bugünü, sabahı baxımından həyati sahə kimi ön planda olmasını hesab edirik. Bundan əlavə 973 milyon manat da bir sıra sahələrə, iqtisadi dəstək, dəmiryolu və elektrik təchizatı layihələrinin reallaşdırılmasına yönəldilib".
