"Azərbaycan Respublikasında mənzil fondunun özəlləşdirilməsi haqqında" qanuna edilən dəyişikliyə əsasən müəyyən olunan yeni qaydalar bütövlükdə dövlət və yaxud ictimai mənzil fondu mənzillərinin özəlləşdirilməsi prosedurlarının azalmasına və mənzillərin daha asan şəkildə özəlləşdirilməsinə imkan verəcək.
Bu sözləri İqtisadiyyat.az-a açıqlamasında Milli Məclisin deputatı Vüqar Bayramov deyib.
Deputat bildirib ki, yeni qaydalara uyğun olaraq Elektron Hökumət İnformasiya Sistemində (EHİS) olan məlumatlar vətəndaşdan tələb olunmayacaq və həmin məlumatlar inteqrasiya olunduğu üçün mənzilin özəlləşdirilməsi zamanı birbaşa elektron sistemdən götürüləcək:
“Həmin sistemdə olmayan bir sıra məlumatlar isə digər dövlət qurumlarına sorğu göndərilməklə əldə olunacaq. Bu da imkan verəcək ki, mənzili özəlləşdirmək istəyən vətəndaşımız çox qısa zamanda və az prosedurlardan keçməklə, həm də daha az xərc çəkməklə mənzilini özəlləşdirə bilsin”.
Qeyd edək ki, qanuna dəyişiklik Milli Məclisin 29 dekabr 2024-cü il tarixli plenar iclasında üçüncü oxunuşda qəbu edilib.
Layihədə qeyd olunur ki, “Daşınmaz əmlakın dövlət reyestri haqqında" qanuna uyğun olaraq, "Azərbaycan Respublikasında mənzil fondunun özəlləşdirilməsi haqqında" Azərbaycan Respublikasının Qanununda düzəlişin edilməsi Azərbaycan Respublikası Prezidentinin 2020-ci il 27 fevral tarixli 1859 nömrəli sərəncamı ilə təsdiq edilmiş "Açıq hökumətin təşviqinə dair 2020-2022-ci illər üçün Milli Fəaliyyət Planı"nın 4.2-ci bəndindən irəli gələrək (dövlət xidmətinin göstərilməsi üçün zəruri olan sənəd və ya məlumat digər dövlət qurumunda mövcud olduğu halda, həmin sənədin və ya məlumatın vətəndaşdan tələb edilmədən Elektron Hökumət İnformasiya Sistemi vasitəsilə müvafiq dövlət qurumundan alınmasının təmin edilməsi üçün bu prinsipin sahəvi normativ hüquqi aktlarda təsbit edilməsi, habelə bu prinsipə əsaslanan elektron xidmətlərin sayının artırılması), habelə "İnzibati icraat haqqında" qanuna edilmiş dəyişikliyə uyğun olaraq vətəndaşa dair sənəd və məlumatın əldə edilməsinin ardıcıllığının müəyyən olunması və hüquqi tənzimlənməsi məqsədi daşıyır.
✓ sənədlər Elektron Hökumət İnformasiya Sistemi (EHİS) vasitəsilə əldə edilə bildikdə sənədlər ərizəçidən tələb edilmir;
✓ sənədlər EHIS vasitəsilə əldə edilə bilmədikdə isə aşağıdakı qaydada alınır:
ərizəçinin razılığı ilə sorğu əsasında müvafiq dövlət orqanından (qurumundan) tələb olunur.
